Na faaalia le loto fiafia ma le agaga faagaeetia o le Afioga i le Peresetene o le Sinoti aoao, le susuga ia Vii Amituanai, o le faafeagaiga o le Ekalesia Metotisi mai Otahuhu, o ia lea na taitaia le sauniga o le faafetai ma le faamanū i le Atua i le faamanatuina o le 21 tausaga o le soifua o le tamaitai o Rosie Adele Penina Lilomaiava, lea sa faataunuuina i le Aso Toonai ua mavae atu. O le tamaitai o Rosie Adele Penina o le alo o le susuga i le faafeagaiga Rev Itumalae ma le faletua ia Tinei Penina Lilomaniava, o le failautusi foi lea o le Sinoti aoao i Avondale.
O Rosie o se tamaitai talavou e galue punouai ma le faamaoni i totonu o le galuega faaleautalavou i le Ekalesia Metotisi i Avondale, i lalo lava o le taitaiga ma le faafailelega a le susuga i le faafeagaiga, poo lona tuaa foi lea, o Rev Itumalae.
O le faafetai na fofogaina mo le aso faapitoa aemaise mo Rosie, na saunoa i ai le taitai e faapea, “O le aso lenei na faia e le Atua tatou te olioli ma fiafia i ai”, a o le faamalosi e faapea.
“O a‘u nei le ala, le upu moni ma le ola, e le alu atu lava se tasi i le Tama, pe a lē ui mai ia te au”. Na saunoa foi le tuaa o Rosie, e faamanino le uiga o le key ua taulimaina nei e Rosie, le susuga Rev Itumalae ma faapea, e lua faitotoa e faaaogāina i ai le key o si ona afafine.
O le faitotoa muamua o le faitotoa i luma o le fale e tatala mai ai faamanuiaga mo Rosie ma le faitotoa lona lua o le faitotoa o tua, e loka mau mai faafitauli o le ola ina ia taofiofia ai le oo mai o faigata o le olaga. Ia o moomooga lava ia o nai mātua ina ia soifua manuia alo ma fanau mo le lumanai. Ia Rosie Adele Penina Lilomaiava, matou te faamanuia tele atu i le atoaga o lou 21 tausaga, ma ia e manatua, o le atoa ai o lou 21 tausaga o se faamanuiaga.Alofaaga mo oe mai ou mātua peleina aemaise ou aiga uma i Samoa ma Niu Sila.
