O le malaga mamao mai i Aukilani i Niu Sila o le susuga ia Misipele Tofilau e ioeina le moni o lona alofa naunau i lana tautoga o Waitangi, o se maliliega faitoalua i lo la va, ua talafeagai ma feauga lelei toe fesootai ma olioli ai lagona o o la loto. E lē gata ina ua taunuu le miti, ae ua tini i le taunuuga o le faiga malaga na sopo mai i ala o faafitauli ma fatia o le olaga.
Sa lei faafiti pe fefe le alofa e pei ona molimauina ia la molimau, e ui ina va i vasa ma vavae i peau o le sami le mafutaga, peitai e feiloai pea o la lagona i minute ma sekone o le aso e ala i talanoaga i telefoni ma fesootaiga faaonaponei, e pei foi ona masani ai le aufaitau a le tatou nusipepa.
Tailo foi i le mafutaga a Waitangi ma Misipele pe faatusalia le taimi o le aumatutua i le faataliga o le pasi ma oso i le vaa pe a umi e lē vaaia le maamusa poo le sweet heart i aso anamua e lē gata o Samoa a o nei foi atunuu.
O le susuga ia Misipele o se alii o loo galue nei i le Air NZ i le malaevaalele i Aukilani Niu Sila, ae o lana anamea o Waitangi ua iu mai lana faafaiaoga i le Iunivesite i Aukilani, ma ua sauni atu i lona faauuga i le masina fou.
O tuaa o le alii faaipoipo ia Misipele, o si ona tamā o Tofilau Tuli Tofilau (Iva Savaii) a o si ona tina o Fiafia Tofilau (Leauvaa). O Matautia Mati (Matatufu Lotofaga) ma Salatōmuaina Matautia (Salani Falealili) o tuaa ia o le tamaitai o Waitangi.
O le ofisa fai faaipoipoga o le susuga lava i le faafeagaiga ia Rev Lance Tautiepa (EFKS Westside) sa taitaia le sauniga ma luitauina le aiga fou ina ia mauaa ma faatumauina le alofa moni ona o lenei olaga ua sasao faaafi le tele o aiga malepelepe ona o le masau o le tuinanau talu faiga a le alii o lenei lalolagi i le tau sailia o sana kegi.
Na maualuga le aso ina ua auai mai le faafeagaiga EFKS mai Melepone, le susuga ia Rev Apineru ma le faletua ia Lagi Misipele faapea le faletua ia Tumua Simanu malaga mai Samoa, aemaise o le tele o aiga ma uo sa molimauina le faamoemoe.
Na saunoa lana auauna afai e faavaeina se aiga i le Atua ma mautinoa e galulue faatasi ma ogatasi manatu e pei o le uluai alofa, e lē mafai foi ona maluelue lea faavae seia oo i le oti. Na lagona e le ulugalii fou le tofatumoanaina o ia upu suamalie ma ua goto ifo i o la loto auā le savaliga umi i le laasaga fou ua laasia nei.
O le uso lava o le tamaitai faaipoipo sa fai ma fofoga o le aso, le tamaitai o Vao Matautia, ae o lona tuagane le tofa ia Mosololo Taiofeite Matautia sa lauga autū o le aso auā malo sa fefiloi ai le auvalaaulia.
O le lava tapena ma le saunia lelei o faaaloaloga, sa lē manofonofo ai le susuga i le failautusi o le EFKS Westside, Laufiso Sagato Taua sa fai ma sui o le auvalaaulia e faafetaia aiga na lua ona ua faamalieina vaega uma.
Na fetaui fola ina ua tulai le susuga ia Lutu Filoialii Ioapo mai le itu o aiga o le ulugalii e tali faitau i le auvalaaulia faapea le taitai o le sauniga ma ē uma na potototo.
O le susuga foi i le tiakono, Risati Vaoiva ma le aiga, sa faia le faaafe i le falesa.
Ua iai le faamoemoe o ni nai vaiaso e aumau ai le ulugalii fou i Brisbane nei, ona toe taliu atu lea i Aukilani i Niu Sila.
Manuia tele le aiga fou Misipele ma Waitangi Tofilau. Alofaaga mai le susuga i le faafeagaiga ia Rev Lance a le faletua ia Lite Tautiepa, lua mātua ma aiga uma lava, uo ma ē masani, aemaise alofaaga mai le pulega a le Samoa Times.
