A o iai pea lenei aai i le tau faamamāina o auala faapea le faagaioina o le toe fausiaina o fale ma mea totino ua masofa talu le mafui‘e ua tuanai, ae na matuā faateia lava i le afiafi o le Aso Toonai i le 5.49pm ina ua toe galulu malosi foi se isi lulu i le pitonuu o Lyttleton, tusa ma le 12km Saute i Sasae le mamao mai le taulaga o Kalaiesetete, o lona loloto e 11kilomita.
Na motusia eletise i nisi o pitonuu mo se itula, ua iai foi auala ma magaala ua toe faaleagaina ma ua atili ai ona faafaigata ona o timuga, ma le pipisi a‘e i luga o le oneone uliuli palapala (liquefaction), o le faafitauli ogaoga lea o loo feagai nei ma aiga.
Ua iai fale tetele i le taulaga ua maluelue pei o le Strategy lea o le a tuu faatopetope i lalo mo le saogalemu, ua faaleagaina alapaipa tetele i Redcliffe ma motusia ai le suavai mo nisi o aiga, aemaise nofoaga maupuepue ua solofa i le pitonuu o Sumner lea ua gaogao ua leai ni tagata o nonofo ai.
Lea foi la ua toe toso le pa puipui (Red Zone) i totonu o le taulaga ma faasāina le tele o magaala ae se‘i galulue le Civil Defence mo le togafitia o faafitauli auā le saogalemu o tagata.
O le siuleo o loo alagaina se ua fiu ma sili ai le tapena ese, ui i lea na maua mai lipoti mai susuga i alii faifeau nisi o ekalesia, e ui lava i se galulu tele sa faalogoina ma luluina ai falesa, maota ma laoa faapea fale taavale o loo faamautu ai nisi, ae o le faafetai sili e leai se soifua o afaina.
E ui lava la i nei mau maluelue, ae sa faataunuuina lava sauniga lotu masani aemaise le faamanatuina o le Aso Sa o Laupama.
Saunoa le susuga Pstr Tavita Seumanutafa (AOG) o loo alaala i Bexley, tasi lea pitonuu mafatia tele i le oneone ma le vai, o le latou falesa foi ua matuā faaleaogaina. I se fesootaiga ma le faletua o Liz Keneti (taiulu o fanau aoga Pasefika Iunivesite Canterbury), o loo faaaogā faleie tetele mo aoga ona ua leaga potu aoga, pau le faafitauli o le malulu, tele foi tamaiti ua sifi ese atu ma sa maua fesoasoani tupe mai le Iunivesite mo fanau aoga ($1000 & $500) talu aafiaga o le mafui‘e.
I se lipoti mai le faletua o Ruta Mckenzie (Early Childhood), ua tapunia nisi o Aoga Amata ae o loo taumafai malosi si a latou foi pitolaau e ala i polokalame faapitoa e faamalosiau ai mo nai fanauiti ua mata fefefe ma tau suia uiga.
Peitai o se fesootai atu a le tusitala i nisi o alii faifeau na faaalia ai e ui lava ina toatele ua see ese ma Kalaiesetete ma ua toagaogao aulotu, ae ua feololo foi i latou ua toe foi mai ona e mauaa lava le faatuatua ma lotomau e fia nonofo pea i le aai maluelue, ae lē sola ai le alofa laveai o le Atua e tumau pea.
