Uma tausaga o le pologa sua paipa o Alataua i Sisifo ma Falealupo

Ua lagona e le loto le faafetai ona ua ea le pologa i tausaga e tele ua alu sa feagai ai nuu o le itumalo o Alataua i Sisifo e pei o Neiafu ma le naumati i le maua o se suavai taumafa.
Tasi lea o vaega tāua i le soifuaga o soo se tagata o le suavai. Ae peitai e ui ina ave i ai le faamuamua i galuega faifai pea a lo tatou malo i tausaga taitasi, e molimauina pea le iai o nuu ma afioaga e mafatia pea i le faaletonu o le suavai, faapei o nuu o le itumalo o Alataua i Sisifo.
E lagona pea le siufofoga o lo latou sui faipule le tofa Lafaitele Patrick Leiataua i le maota fono i Tiafau i le finauina pea o le Malo i le fia maua e Alataua i Sisifo o le suavai.
Ua tele foi lipoti a tusitala i le faaletonu o le suavai o lea vaega o Savaii, ae peitai o lea ua faataalise galuega a le pulega o le suavai ma eli le vai ua maua ai e le nuu o Neiafu le suavai.
O le vaiaso na tea nei na silasila ai le Malo i fua o galuega sa unaia e le afioga i le Palemia le pulega o le suavai ma i latou uma e aafia i le galuega ina ia faanatinati le laveai mo ia nuu o Savaii.
E pei ona silafia o se tasi o tauaofiaga a le Palemene i le tausaga ua mavae, na toe laga ai foi faaletonu o le suavai i Alataua i Sisifo ma Falealupo. O felafolafoaiga i le tala autu o le tupe na mafua ai ona toe afea le suavai o ia itumalo i saunoaga a o la faipule le afioga Aeau Peniamina ma Lafaitele Patrick Leiataua.
O le taitai o le Malo na tulai e tali faauilavea ma ia ave ai loa le tuualalo i le pulega o le suavai, ia faatino le galuega i le tulaga e tatau ona vave maua ai e tagata o ia itumalo le suavai.
O Oketopa o le tausaga ua mavae na amata tino mai ai le galuega ma maua e Falealupo le suavai ina ua ta’i iai paipa i fale o aiga ua susua. Le tausaga nei o lea ua susua paipa o Neiafu, ma o le mau a se tasi o matai matua o le afioaga, faafetai ua faamālū i se paipa ae lei oo mai le valaau a le matai.
O se tasi lea o afioaga e faigata tele le suavai, seiloga e maua ni timuga ona maua lea o se suavai lelei i tane a aiga. Le taimi nei la e tusa ma molimau ua lagona le fiafia ma le faafetai o aiga uma e silia i le selau o Neiafu auā ua vaaitino i le faamanuiaga ua leva tausaga o moe miti  i ai.
Ua fai i lagi le folauga a nisi o tulatoa o le nuu sa latou taumafai mai lenei atinae, ae o lea ua i‘u a latou galuega i se tala fiafia i lenei auga tupulaga ua maua le suavai e alu atu i paipa.
O le lelei o le suavai ua maua e Neiafu, o se isi lea tulaga lelei i le vaai mamao i atinae e faatutū i le nuu ma lea itumalo, e pei o atinae tau tulisi i ni faletalimalo ona o se tasi lea o afioaga e matagofie le lauoneone o ona matafaga e fiafia tele i ai tulisi. Faafetai ai i le Malo ua alu alu lava taumafaiga ae o lea ua feinu ma taumamafa Falealupo ma Alataua i Sisifo.