O le afioaga o Patamea i Savaai o loo faatuina ai se atinae tilapia a le susuga Leo Swalger. Na molimauina le lapopoa o i‘a ua iai i faatanoa e pei ona vaevaeina.
Na faaalia e se tasi o alii o loo faigaluega ai mo le tausia ma le fafagaina o tilapia, le Susuga Tunu Mapo e faapea o loo iai isi i‘a ua latou tuuina i se vai i totonu lava o le fanua o nonofo ai. “Ua ova ma le tausaga le atinae lenei. O le tausiga foi o i‘a e lē o se mea faigata tele, auā e faatau mai lava meaai e fafaga ai i aso taitasi. E faalua ona fafaga i le aso ma e tuu eseese foi i‘a i vaega.
“Ua iai le faatanoa mo i‘a laiti faapea ai ma le faatanoa mo i‘a feololo aemaise o le faatanoa mo i‘a lapopoa. O le taimi nei e pau lava le faafitauli o le leai o se maketi e faaaogā i ai i‘a ua lapopoa. O i‘a o loo i le vai i totonu o le fanua e pei ona ou taua o le matua lapopoa lava.
“Ua lelei foi i le faaaogāina mo meaai aemaise o taligamalo ma isi mea faapena. O le taimi nei matou te lei faaaogāina lava se i‘a talu ona amata le atinae. Ua na o le fafaga lava ma tausi le galuega lea e fai, ae pau le tulaga o le fia maua o se maketi mo i‘a ia ua lapopoa,’ saunoa i ai Tunu Mapo.
E lei manuia taumafaiga e fesootai atu i le susuga Leo Swalger mo se tala auiliili o lenei atinae.
