Faatuina le “Ia Malamalama Agape Bible College” i Melepone

“E tatau ona ou faia le galuega a le na auina mai a‘u,” o le manatu autu lea o le finagalo faauuina a le Atua na saunoa i ai le susuga i le faafeagaiga taulagi ia Dr Peniamina Williams, i lana lauga faavae mo le faatuina o le Kolisi faa Faifeau e pei ona tatalaina i le aai o Melepone i le Aso Sa na tuanai atu.
Na faatumuina se tasi o malu i le pitonuu o Melton i le maave eseese o le aufaigaluega  totofi a le Atua mai fatafaitaulaga e fia, aemaise o le paia ma le mamalu o le atunuu na afifio ma talaaao atu e lagolagoina ma patipatia lenei faamoemoe matagofie  ma le tāua ua amataina nei i Melepone.
O le susuga lava ia Dr Peniamina na taitaia le sauniga ma fofogaina le tala otooto o le galuega, lea na ia tauaaoina ai le tusipasi faamaonia e amata ai le galuega (certificate of Extention ) i le susuga i le faafeagaiga ia Maiava Ulia, o le peresitene o le kolisi i Melepone.
O le susuga ia Maiava o loo tausia le Ekalesia a le Way of Salvation AOG i Melton, lea na  nafa ma le taumafataga felanulanuai ma gasesega uma o le aso, o se tasi o vaega o le sauniga o tala faaevagelia na saunia e le Ekalesia LMS Toe Fuataina a Sunshine a le susuga ia Faiumu Faletuai.
O le kolisi fou ua tatalaina i Melepone, ua tolu i ai lala o le kolisi i Ausetalia, o loo i Perisipeni ma Sini isi lala, ma o loo i lalo uma o le vaaiga ma le faamalumaluga a le susuga ia Peniamina.
Na saunoa le susuga ia Maiava e ui ina ua toatele le paia o le atunuu ua mae‘a resitalaina mo le kolisi, ae o loo tele pea avanoa mo le mamalu o fia faalauteleina le silafia mo le Tusi Paia ma le finagalo o le Atua. E tolu aso o le vaiaso ua faagasolo ai nei aoga ma vasega, ma e ono faalautele lava i le lumanai.
Na matagofie nauā le aso ona o le talaaao mamao mai o nisi o faafeagaiga mai le aai o Perisipeni ma le aai o Sini, faatasi ai foi ma nisi mai laufanua o Aotearoa e molimauina le aso. Na avea foi lea ma mitamitaga i le Ekalesia a le Way of Salvation, aemaise o aiga o le susuga ia Peniamina, lea na opea ai i maota a latou faaaloaloga faaleaganuu mo faafeagaiga uma.
Na ta‘ape fiafia ma le olioli Samoa na potopoto, ae ua maualuga le viiga o le Tapaau sili oi le lagi, auā o le faamoemoe ua taunuu, o le laau o le soifua lea. Ia manuia soifua o le a a‘otauina i totonu o le kolisi, ia avea o ni toa mo le talalelei.