Ua tumau pea le faaiuga a le pulega o le taulaga le PUMA lea o loo avea ma se tasi o vaega o le matagaluega o punaoa faalenatura ma le siosiomaga e fausia le malumalu o le Ekalesia Worship Center i Samoa i lona fanua umia saoloto o loo tuaoi ma le faletalimalo o le Millenia i Sogi.
O le taunuuga lea ua oo i ai le Faamasinoga Maualuga i sana faaiuga e faapea na fofogaina i le vaiaso ua mavae e mafua mai i se talosaga tetee a le faletalimalo o le Millenia faasaga i le faaiuga a le PUMA e mafua i lana faaiuga e fausia le malumalu ae o loo taoto le isi iuga a le faamasinoga lea sa faatonuina ai le Ekalesia Worship Center ia faaitiitia le pa‘ō o leo o pesega ma mea fai faaili pe a faia sauniga a le ekalesia ma isi faatasiga faalelotu.
O le faaiuga ua aumai ua lē gata ina faaauau ai pea le fuafuaga e fausia le malumalu ae ia tausisia le maualuga o le pa‘ō o leo o pesega ma mea fai faaili i le maualuga ua fautuaina ai le ekalesia e le PUMA.
Ua lipotia e faapea o le galuega o le a faatino a le ekalesia, o le a fausia e tusa ma tulaga tau inisinia fau fale o le a pa puipui vaega uma mai le soona alu i tua o leo, pe o se isi faaupuga e sound proof.
E iai le talitonuga o le faamasinoga lea na faatuai ai ona gaioi le galuega o le malumalu o lea ekalesia ua latou umia se tasi o eleele e silafia e le aumatutua, ona sa iai nisi o pisinisi i tausaga ua mavae lea sa iai le faletalimao o le Apian Way sa sosoo ma le faletalimalo o le Tiafau, a ua fausia ai nei le isi faletalimalo le Millenia i Sogi.
