Ua sauni atu nei le tele o Ekalesia Kerisiano i totonu o Aukilani mo le 7 aso o Galuega alofa i le lautele o tagata o loo moomia le fesoasoani. Ua ta‘ua lea faamoemoe o le Servolution, e amataina i le aso 19-25 o Aperila. O le ono ai lenei o tausaga o faafoeina lea faamoemoe e pei ona amataina mai i totonu o le pitonuu o Manurewa ma sosolo atu ai lava i isi pitonuu o Aukilani, Palmerston North, Brisbane ma Sini i Ausetalia. O le tausaga nei foi na oo atu ai lenei galuega i totonu o Samoa.
Na ta‘ua e le taitai o le Servolution le susuga i le faafeagaiga ia Lui Ponifasio e faapea, “O lenei faamoemoe na amataina e le matou Ekalesia i Manurewa ona o le naunautaiga e fia fesoasoani i le tele o tagata matutua ma tina ua leai ni taitoalua i totonu lava o Manurewa”.
Na ta‘ua foi e le susuga i le faafeagaiga, “O le Servolution o se avanoa tāua lea e auauna ai mo isi ma momoli atu i ai le alofa o le Atua i tagata e ala lea i le faatinoina o le alofa ae lē na o upu”.
O nisi o galuega e iai le faamamāina o fanua, moaina o le vao, fufuluina o fafo o fale, foaiina o taumafa ma lavalava mo aiga e toatele tamaiti, faafiafiaga ma asiasiga i maota o tagata matutua ma le lipeaina o fale mo tina nofo toatasi.
O nisi foi galuega e aofia ai le faafouina o malae taalo mo fanau i aoga, valieseina o tusitusiga i pa o fale o aiga, taalaoina o le lapisi, fesoasoani i tagata faato‘ā malaga mai i Niu Sila poo new migrants, fafagaina o tagata e leai ni aiga, o polokalame mo tamaiti ma le tele o isi galuega fesoasoani.
O se tasi o vaega tāua o le Servolution i tausaga taitasi o le tuuina atu lea o taumafataga mo alii leoleo e faafetaia ai le latou galuega o loo faia i totonu o pitonuu taitasi. E faapea foi ona tuuina atu morning tea mo faiaoga e faafetaia ai le latou galuega o le a‘oa‘oina o fanau.
Ua molimauina le lagolago malosi mai o le vasega o leoleo i nei galuega a le Servolution, aemaise foi le fesoasoani mai i le saunia o meaai mo i latou o loo tauofo o latou taimi e galulue ai.
O le amataga o le tausaga nei na amata ai le galuega o le Servolution i totonu o Samoa, lea sa ave ai le fesoasoani mo i latou na afaina i le afā o Eveni.
E sili atu i le 50 i latou mai Ausetalia ma Niu Sila na malaga atu mo le faatinoina o lea galuega e pei ona galulue faatasi ai ma le Ekalesia o le Lelata Christian Fellowship.
E iai le faamoemoe o le tausaga nei e sili atu i le 70 ekalesia eseese o le a auai i le faatinoina o nei galuega alofa.
O nei ekalesia e mai fata faitaulaga eseese e pei o le Metotisi, Assembly of God, EFKS, Katoliko, Peace Chapel, PIC, Full Gospel, Au Uso Kerisiano, Papatiso, Worship Centre, New Life. E lē gata o Ekalesia Samoa ae faapea foi i Ekalesia palagi, Initia, Aferika, ma isi atunuu i totonu o Niu Sila.
Mo nisi o faamatalaga pe fia auai foi i le Servolution, silasila ane i le
www.servolution.co.nz poo le
https://www.facebook.com/ServolutionNZ.
Pe valaau le telefoni 09 268 9295.
Servolution: Faatino le alofa i le auauna atu
More Posts
