O le aso 7 o le masina nei, lea o le a feiloai ai mo le taimi muamua le au Netipolo faavaomalo a le atunuu mai Samoa ma le Silver Ferns.
O le aai o Porirua i Ueligitone lea o le a iloilo ai au nei e lua, ma e lē taumate o le a faatumulia i le atunuu o loo alaala i lea vaega o le Laumua.
O le taaloga muamua lea a le Silver Ferns fou lea ua faato‘ā mae‘a atu nei ona filifili, a o faasauni atu ai mo le latou Taamilosaga masani ma Ausetalia ma Egelani i tausaga taitasi, ae faapena foi ma le tapenaga mo Taaloga o le Taupulega le Commonwealth i Initia. Ua leai se avanoa o le tamaitai Samoa o Cathrine Latu lea sa lau mai i le Training Squad a le Silver Ferns, ae ua lē mafai ai foi ona agavaa mo le ‘au a Samoa ona ua mae‘a ona iai aiaiga faapitoa o Konekarate.
Ia o le mea foi lea a Niu Sila lea o loo saisaitia ai le tele o tama Samoa i le taaloga lea o le Lakapi. Peitai o se tala fiafia ona o lea ua filifili mai ai le isi alo o le atunuu mo le au lenei a Niu Sila mo le taimi muamua foi, le tamaitai o Grace Rasmussen. Sa taalo i le Kalapu a Aukilani le Northern Mystics i le taamilosaga na mae‘a atu a le Transtasman.
O le filifilia o Grace ua toalua ai nei ma le tamaitai o Maria Tutaia ma o se tasi o sui faamoemoeina a le Silver Ferns. Ae i le au a Samoa, na maua a latou taaloga ma le au masii na malaga atu mai Aferika i Saute lea na suipi mai i Samoa ia latou taaloga e tolu na fai, peitai o le taaloga ma le Ferns o se toleniga ma se lesona lelei lea mo le tamaitai Faiaoga o Linda Vaganā ma le tamaitai kapeteni ia Francis Solia, a o tapena atu foi mo Taaloga o le Taupulega.
O le au atoa a Niu Sila: Liana Barrett-Chase, Leana de Bruin, Temepara George (vice-captain), Katrina Grant, Joline Henry, Laura Langman, Grace Rasmussen, Anna Scarlett, Maria Tutaia, Irene van Dyk, Casey Williams (kapeteni), Daneka Wipiiti.
O le au atoa a Samoa: Francis Solia (kapeteni), Caroline Ah Chong, Malu Faasavalu, Crete Liuaana, Sose Tavae, Monalisa Tofilau, Geraldine Solia, Ofeira Karetau, Lee Edward, Brooke Williams.
