E oo mai lava i le taimi nei o loo tuufesili pea le atunuu aemaise o i latou e fiafia i le taaloga o le Faipelega, poo le ā le isi laasaga mo le alo o le atunuu, Toaletai David Tua, ae poo tumau pea ona olaola lona faamoemoe e fia avea ma Siamupini o le Lalolagi o le lumanai.
Ua lua nei vaiaso talu ai ona mae‘a le fusuaga faigata na tutusa ai ma le alii o Monte Barret, ae i ni lipoti mai Amerika na ta‘ua ai le tumau pea o le tulaga o loo faatulaga ai Toaletai i le numera lua, i le vaega o fusuaga a le WBO.
O se tala fiafia tele lea ona sa iai le manatu o le tutusa ma Barret ua ono lusi ai lea tulaga lelei.
O le faailoa mai o lea tulaga manuia i faatulagana, ua mautinoa ai le tele o le avanoa e ono toe oo ai David i le luiina o le fusi o le Lalolagi, lea e finauina e nisi o faalapotopotoga se 4 i tulaga lava tau faipelega e aofia ai ma le WBO.
E tusa ai foi ma nisi o lipoti tusitusia mai Amerika, na faailoa ai le tuuina atu o se Tusi aloaia a le alii o loo nafa ma le faalauiloaina o Toaletai ia Cedric Kushner, i le Peresitene o le WBO, Francisco Valcarcel, ina ia aua ne‘i avea le toeseina o ‘ai o Tooletai ma auala e suia ai o lona tulaga ma le WBO.
O lea tusi o loo ta‘ua ai le vave o le faaiuga a le alii Laufali ia Randy Newman.
O loo lipotia ai la le talia lelei o lea tusi e le WBO, ma tuuina mai ai ma se faatonuga faamalosi ina ia tatau ona toe saili se isi paga lata mai a Toaletai, ma ia o se paga e tatau ona matuā siitia ai lana faatinoga o le taaloga, pe afai lava o loo fia toe oo i le Fusi o le Lalolagi.
Ua matuā faailoa le agaga faafetai o Kushner i lea tualga e ui ina sa osofaia tele i faitioga a le alii Niu Sila o Lance Revill, lea sa ta‘ua ai lona totogiina o Faamasino.
E lē o fia talanoa tele i ai le Faiaoga i lea mataupu ae na ona ia saunoa e ono oo lava i le Faamasinoga. Ae i Ausetalia o loo ua faailoa ai le toatele pea o tagata e lagolagoina ma fiafia pea ia Toaletai ma lona faamoemoe o loo tulituli nei.
O le alii iloga i Fusuaga ia Khoder Nasser na ia ta‘ua e tumau pea David Tua o se tagata faigata mo le Fusi, ma e toatele foi o loo fefefe pea i le agavale malosi o Tua, aemaise lava o lana fusuaga lea na toe foi mai ai ma Cameron.
I le taimi nei e lē o faailoa mai poo ai le isi paga a Toaletai, ia pe toe maua foi le rematch ma le alii o Barret, ona na saunoa le faiaoga o loo faamanu‘alia Tuaminator i lona tau‘au, lea foi na ta‘ua i nisi o lipoti le tau taofia ai e le Fomai o le fusuaga ma Barret.
