E tusa o le 6 i le taeao po o le Aso Tofi na tea nei, ae faateia si nei aiga Samoa, ina ua vevesi atu leoleo ma sio lo latou fale, ma faatonu le aiga atoa o loo i totonu ina ia o ese mai i fafo ma siilima ane ia i latou.
O le itu faanoanoa i lenei aiga, ona e lei mafai ona toe tuu atu e leoleo se avanoa se‘i tau saili ni ieafu ma lavalava mafanafana mo le fanau, ae ua aumai faatopetope ai lava i fafo. E pei ona vaaia i ata, o nisi e lei maua se taimi e sue ai ni seevae auā le malulu o fafo.
O le aiga lenei o loo i le pitonuu o Grey Lynn i Castle Street, ma e tusa o le lipoti a le Stuff na iai lenei tala, o se tasi o atalii o lea aiga, le alii o Daniel Vae, o ia lea sa agai i ai le osofaiga a leoleo, e tusa o ni lipoti na tuuina atu i leoleo faapea o loo nofo Daniel i lea tuatusi.
O nai aiga tuaoi na fesoasoani ane e ave si fanau a le aiga e faaaogā o latou fale taele ma sina meaai, auā na ta‘ua e leoleo i le tina ma le fanau, e lē mafai ona latou toe agai i lo latou fale mo le aso atoa, ona o lea sa togi i ai le kasa faatagi mata (tear-gas).
Na mae‘a lelei sailiga a leoleo e latou te lei maua le alii na latou sailia mai lea tuatusi, auā na ta‘ua e le tina ia Aliitasi Vae, ua leva ona lē toe nofo ia latou le alii o Daniel talu mai lava le tele o taimi e aafia ai i faafitauli ma leoleo.
O loo faagasolo pea la sailiga a leoleo i lenei mataupu.
