Ua faailoa mai nei e le Matagaluega o Fefaatauaiga ma Leipa le aso o le a amata ai ona faasaoina itula o le ao poo le daylight saving i Samoa, lea o le a faatino lea suiga fou i le vaeluaga o le po o le aso 25 o Setema o le tausaga nei. Ua faaalia o le a ki ai i luma le uati i Samoa pe a ta le 12 o le vaeluaga o le po o le aso 25.
O lona uiga o le a ki i le tasi o le vaveao o le aso 26 o Setema 2010, ma o se faiga o le a televave ai le taimi i Samoa i le itula e tasi. E iai le talitonuga o le taimi foi lea e amata ai le daylight saving i Niu Sila.
O lona uiga e lē toe taimi tutusa Samoa ma Niu Sila pe a oo ina faatino lea suiga e pei ona sa sau a‘i i tausaga ua mavae. E pei ona silafia e oo loa ina taunuu Niu Sila i le vaitaimi lea ona ki lea i luma o le uati ma tutusa ma taimi i Samoa, ae a oo ina mae‘a ona toe ki lea i tua o le uati ona eseese lea o atunuu e lua i le itula e tasi. I se isi faaupuga e tasi le itula e televave ai le uati i Samoa e pei ona iai i le taimi nei. O le aso 2 o Aperila o le tausaga fou e mae‘a ai le daylight saving i Samoa ae o le aso 4 o le masina lava lea o le tausaga fou e faato‘ā mae‘a ai le daylight saving i Niu Sila. O le tausaga na tea nei na pasia ai e le Palemene le tulafono e faatino ai lea suiga ma o le Matagaluega o Fefaatauaiga ma Leipa o le a nafa ma le vaaia o taimi e faatino ai le faasaoina o itula o le ao poo le daylight saving.
