A oo ina fetaliai galutau ma galu fefatiai i le soifua o le tagata, ona talipeau lea o le Tautai matapalapala o le gataifale, ae ta liu le auvaa auā ua taili faatasi le toelau ma le la‘i. O le ala lea o le tautalia o le alaga o galu i uluulu o laau ina ua pisia i‘ulauniu ma taulamuli ina ua taatiga laufanua o Kalaiesetete i le finagalo lē seua o le Atua.
O le tuua o le malo e le tina tiakono o Faimafili Luanei Togiaso, 63 tausaga o le faletua sa tausialii i le afioga Leota Faalepo Togiaso ua lagomau mai ti‘asa. O le paia lava lea o taualuga o Manu‘a ina ua tuua le malo e le afioga Tooa, o se ‘Auga Faapae e fitoitonu i alo o Malietoa, Sapa‘u ma Leiata‘atimu, le paia i aiga Sa Tilialo, le fetalaiga Luatua ma le Ga‘utala, le mamalu i le faletolu ma upu i le fale Tuamasaga.
Ua faamanavaina e le Atua galuega a le auauna i le aso 6 Aperila i le maota gasegase i Kalaiesetete, o se faamatuatina i totonu o lona aiga, lona nuu aemaise lana ekalesia e pele ia te ia, ma o le fa‘ia o se poutu o se maota e faalogoina le gatete o le fale atoa.
a faapena lagona ina ua tuua le Ekalesia St Pauls Pacific Presbyterian Church ae tainane le mamalu o le aiga lotu e se tasi sa avea ma pou malosi o le galuega a le Atua i totonu o Kalaiesetete.
Sa saili i ai le mau e lana fanau, lona aiga ma lana ekalesia lea sa faaalia i lona soifua galue, ae ui ina tatou moomoo e taofiofi Faimafili auā le mau sa ia te ia, ae sili le silafia e lo tatou Alii le Manuia ua folafolaina mo ē ua manumalo. O lona sauniga faaleaiga sa faia lea i le Ferry Road Chapel taitaia e le susuga i le faafeagaiga Lapana Faletolu, sa faatumulia i aiga i Niu Sila ma Samoa, fanau malaga mai Ausetalia aemaise lana ekalesia pele.
Na soifua mai Faimafili i ona tuaa o Savea Mose ma Su Sauvii, e lona iva o ia i le fanau e sefululua, ma faaipoipo atu ia Leota Togiaso o Levi-Saleimoa. E toafitu o la alo ma fanau a fanau e sefululua.
O le susuga Toetu Alosio (Ueligitone) sa molimau e fai ma sui o aiga e lua faapea sui o le fanau. O le failautusi o le ekalesia Laufiso Solimalo na molimauina le soifua galue faamatafale o lenei tina lea na ia faaauauina le tofi tiakono o Leota ina ua maliu i le tausaga 2006.
E tele galuega lelei sa tautua ai Faimafili i lala o le ekalesia e pei o le mafutaga a tina, o le Welfare ma le faamalositino aemaise le aufaipese, auā o se tina e nota maualuga tusa lava pe pa‘ulua ae o loo logomalie i le faafofoga a le Atua. O ona toe sauniga sa faia i le taeao o le Aso Lulu, aso 13 Aperila i le malumalu St Andrews Merivale. O le susuga Lapana Faletolu sa taitaia le sauniga, o tiakono o le ekalesia na momoli maia lona sa i totonu o le malumalu.
Toatele le mamalu o le atunuu na auai aemaise le aufaigaluega, Rev Robin Walsh, faifeau mālōlō Samoa Mavaega, tausi matagaluega Ale Palelei (Metotisi), faletua Elisapeta Seumanutafa (AOG). O le fetalaiga Savea Foti Mose (Levi-Saleimoa) sa fofogaina le molimau i totonu o lona aiga i Samoa, “ua malie mata e vaai, malie taliga e faalogo i le auaunaga a Faimafili”.
O se tina tausi aiga ma lima ola i le faafaileleina o lana fanau, e pei foi ona faaopoopo i le molimau matagofie a le failautusi aoao o le ekalesia, le faletua o Atena‘i. Na faauma ona toe sauniga i lona oliolisaga i le fanua maliu i Memorial Park, e pei ona tomatauina upu faamafanafana e le susuga Lapana Faletolu, “o le iloa o le Atua e ola ai ma ia faatuatua ia te Ia, ia faafetaia le Atua i le soifua galue o Faimafili”.
Na tuumuli le aofia mo le peau faamavae ma le taumafataga tele sa alo i ai le mamalu o aigagalua i New Brighton, o se aso fiafia ae na tau faateia foi le aofia ina ua galulu faafuasei le aftershock malosi a o alo i le taliina o le sua, peitai na toamalie le aupeau.
Tusa ai ma aso faapenei i faaaloaloga faatamalii sa faapea ona tala ie o auafa, a o ni moegalafo foi sa faimeaalofa ai Luatua ma le Ga‘utala ma le mamalu i le faletolu auā le susuga i le taitai sauniga faapea le aufaigaluega a le Atua aemaise le ekalesia pele, a o Samoa potopoto na auai i le molimauina o le toe aso o le tina.
O le fetalaiga Savea Foti Mose na lauama tootoo auā faaaloaloga maualuluga, ae o le tofa Vaifale Tumua sa tali fuaitau e fai ma sui o le ekalesia ma le valaaulia. Na tatalo faaiu le susuga Lapana e faauma ai sauniga o le tina, peitai o le aoauli o le aso lava lea sa tuuina aloaia ai i lalo poutu tetele lea na lalago ai le malumalu o lenei lava ekalesia St Pauls Trinity Pacific Church, lea sa faaleagaina e le mafui‘e. Ia faamaise le agaga faamafanafana o le Atua i le fanau pele ua tuua aemaise le aiga faavauvau. Ia gase toa ae ola pea pule.
