Ua mae‘a le faitau tausaga, ua tuanai foi le faitau masina, ma ua faapopo ai o ni Asoua a ua lē tuua Aso Folau, i le faamoemoe o le toeaina ma le mamalu o le ekalesia EFKS i Panmure i Aukilani i Sasae.
O le mauga o le Atua, o le malumalu tapuai o lana fanau ua faatini foe mo le a‘e, ma ua tau faamae‘aina galuega mulimuli, ona osi loa lea o le taulaga ma faapaiaina mo le Atua ma lana galuega.
O se faalepo ma se manaoga sa vaai mamao i ai mai le tele o tausaga ua mavae, peitai ua vavala mai ata o Taulelei, ina ua fai le tino o le moemitiga sa fauao faupo.
O se vaaiga matagofie tele ua tulai mai ai le galuega i le taimi nei, ma o se fiafiaga lea ma se mitamitaga i le au tapuai, ma le au galulue.
Ona talu ai o le a tau lau o le faamoemoe, ma pese i le pese o le viiga o le Alii ina ua tuanai le tele o le vaosa ma le vaofilifili sa tauivi mai ai ma le faamoemoe e iai le aso, ma le taimi e tagai ai i ula, ma uu ula.
E lē gata i le malumalu fou o le a faapaiaina, ae faapea foi ma le hall e pei ona ua mae‘a foi, o se vaega o le galuega tele sa feagai ma le Agai o Tupu, ma le Falefa o le Aiga Salemalama.
E ui i le faigata ma o le galuega foi e lē ‘asa ma faalavelave, peitai ua a‘e ma le malo faiva o le Aiga Salemalama ua sao foi ma ulimasao mai faalavelave faafuasei ma le lē maalofia. O se feiloaiga ma le fofoga o le ekalesia, le susuga ia Manuo Afamiliona, sa ia faamaonia ai lagona o le fiafia ma le olioli i le tulaga ua oo i ai le galuega, e ui ina o loo faamae‘aina nisi o vaega laiti o totoe. E faaopoopo i le agaga fiafia ma le faafetai, le viiga o le Atua, ona o se mafai ua taunuu i ai le soifua tautua ma le ola auauna o lana fanau, ma lea foi itu o le galuega.
E lē faaitiitia foi le agaga faafetai i le Taufalemau, auā le tapuaiga i lea aso ma lea aso, a o alo faiva i latou mo le faatinoina o le galuega.
Sa ia faafetaia foi le mamalu o le aulotu i ona tulaga uma, ona o le lē faalogologotiga, ae galulue pea ma le punouai, la lea ua silasila ma vaai i le tino mai o mea, e ala i le malumalu tapuai, ma le hall mo le faataunuuina ai o le tele o fuafuaga a le ekalesia.
O se galuega tele le galuega e pei ona sauni e faapaiaina, ma faaulufaleina. E limasefulu ma le tolu le aofai o matafale galulue, ma o i latou foi nei sa feagai ma le galuega ma le fausiaina o le malumalu.
E lē se galuega taugofie foi, pe a silasila ma tagai i ai, i fafo faapea foi ma lona anofale. Na pau lea o le tulaga e lei mafai ona faalauiloaina mai, o le ata o le galuega, peitai e pei ona silafia, o le tala atoa o le galuega o le a mafai ona fofogaina, pe a mae‘a ona faapaiaina.
O le vaiaso nei i lona Aso Tofi aso 21, o le a amata ai le polokalame i se vaega e pei ona fuafuaina. O le tusia o le aao mafola o aiga ma uo, o le po pese ma taalolo, o le a faataunuuina uma lava i le Aso Tofi aso 20, i le hall a le EFKS i Otahuhu.
O le Aso Faraile aso 22, o le a mālōlō ai ma tapena nisi o fuafuaga, a o le Aso Toonai e sosoo ai, aso 23, o le a faapaiaina ai loa le malumalu ma faamae‘aina ai le polokalame sa atofaina.
Avea foi lenei avanoa lelei, e faamanuia atu ai le Samoa Times ma le Radio Samoa, i le faamoemoe o le ekalesia i le aso atofaina. Talosia ia avea le malumalu o le Atua, o se nofoaga e fofoa ma faafaileleina ai ni agaga, a o se nofoaga foi e saili fofo i ai, ma fai ma faamafanafanaga i soo se tasi e mafatia, ma fia maua se fesoasoani i le tino, agaga ma le mafaufau.
