Ogaoga tauaiga maa i misa o taaloga

“O vevesi uma nei e mafua lava i taaloga”… Leaupepe Fatu Pula
“Fai mai o le taua le mea na fai i le alu o tauaiga maa”. O le faamatalaina lea e le sui sooupu o le Matagaluega o Leoleo ma Falepuipui, afioga Leaupepe Fatu Pula, o le vevesi na tulai mai i le pitonuu o Leonē i Apia i le tusa nei ma le vaiaso talu ai. “O lea e aumai lipoti e faapea o le vevesi na mafua i taaloga”.

O le faamatalaga lea a le sui sooupu ina ua fesiligia. I le nuu o Vaitele-tai o tauga maa foi na tulai mai ai i le afiafi o le Aso Toonai, aso 9 o Aperila 2011.

Faaalia e le sooupu o le matagaluega o leoleo, o se vevesi na mafua foi ona o se taaloga lakapi i le Aso Toonai lava lea i le va o le au lakapi a le nuu o Vaitele-tai ma se au a se tasi o afioaga e lē o mafai ona faasalalau faalauaitele ona e loo faia suesuega a leoleo.

“O le fautuaga lava i le atunuu e agai i pulega a matai ina ia maua le maopoopoga e faatonutonu ai tupulaga ina ia alofia le aliali mai pea o ni vevesi faapea”.

E 17 tausaga o se alii talavou mai le nuu o Vaitele-tai o loo taofia i le maota gasegase o Tupua Tamasese Meaole i Motootua.
E tuga tele manu‘a o le alii talavou e pei ona faailoa mai e leoleo ma o le aso na tupu ai le faalavelave e oo mai i le Aso Lua na tea nei, e lei malamalama lava le taulealea, ma o le molimau foi lea a nisi o le aiga.

O le vevesi i Leonē na faaalia e Leaupepe e toatele na auai ma ua molia ai tagata e to‘a 28 o lea pitonuu o Apia i le lima i maa ma le tauai maa. O fale o aiga na aafia i lea gaioiga ae e lei faailoaina mai e leoleo pe na manunu‘a ai ni tagata.

Faaalia e Leaupepe Fatu Pula o loo tau sailia e leoleo i latou na aafia i le tauaiga maa i Vaitele-tai ma o loo suesueina e le ofisa o leoleo i Tuanaimato le faalavelave. O tioata lapopoa pito i luma o le faleoloa o Massas i Vaitele-tai lava na matuā afaina i maa. O nisi foi o misa muamua atu sa aafia ai foi tioata o lea faleoloa.

“Se ua tatau ona tuu nei mea o taaloga ma le vevesi ai o tagata”. O le lagona faaalia lea o se tasi o tamalii o le afioaga o Vaitele-tai e mafua i le vevesi ua aafia ai se tasi o tupulaga o le latou nuu.

Ua tatau i le Malo ona toe silasila totoa i lea tulaga ma fai ni aiaiga talafeagai mo i latou e mafua ai se vevesi ona o le iuga o se taaloga.
Ua toe faamanatu mai ai vevesi a nisi o kolisi maualuluga i nai tausaga ua mavae atu, na mafua lava o taaloga lea na faamanu‘alia ai se tamaitai o le Kolisi o Malua Fou i se pomu fagu karasini na liai atu e se alii aoga o le DonBosco.

O loo tuli le faasalaga faafalepuipui o i latou na molia i lea foi faalavelave.