‘Ua leai se maopoopoga o le HRPP,’…Palusalue Faapo II

Ua lē mafai ona faaalia se finagalo o le Sui palemia o ia foi o le sui taitai o le vaega faaupufai o le HRPP i ni fesili sa fia tuusa‘o i ai e uiga i se finagalo o le taitai o le Itu agai le afioga Palusalue Faapo II e faapea, ua tele vaega ua i totonu o le HRPP ma ua leai sona maopoopoga.
I le fono a le taitai ma le sui taitai o le Tautua Samoa ma tusitala i le Aso Faraile 8 o Novema 2013, na faailoa ai e le taitai o le Itu agai lea tulaga. Saunoa Palusalue o le mātau lea i ai a le Itu agai ua tele vaega, peitai na te lei mafai ona tali i ni fesili pe fia ni vaega o faipule o le HRPP ua faamaopoopo lava le itu latou.
Sa lē mafai foi ona tali le taitai o le Itu agai poo ai ia faipule ae na ona ia saunoa mai o loo ia silafia lelei i latou ia ma a latou vaega. O le fesili i le taitai o le Tautua poo iai ni faipule o le HRPP o loo latou molita‘i atu ia te ia ma lana vaega faaupufai lea tulaga. Na soisoi Palusalue e lei tali mai ae faalava ane le sui taitai le afioga A‘eau Peniamina ma ia tali i le fesili lea sa ia saunoa mai ai, o le tulaga lava lea ua masani ai i faiga faapolokiki.
E tele nai faamatalaga ua oo mai i le tusitala e uiga i ia vaega e pei ona ta‘ua ai suafa o nisi o faipule matutua ma faipule talavou o le HRPP ua foliga ua fai lava le vaega a le itu ia. Peitai e lei mafai ona faamaonia tonu ona o loo malaga le taitai o le vaega faaupufai i fafo le afioga i le Palemia.
Na oo le finagalo o le taitai o le Itu agai i le tele o vaega a faipule o le HRPP ona ua iai atugaluga o Palusalue i faaletonu ua laga e le suetusi sili i lana lipoti lea na faataatia i le Palemene ia Iuni o le tausaga ua mavae, ae e lei oo atu lava i le Palemene mo le talanoaina talu ona tuuina atu le lipoti i se komiti faapalemene mo le lauliliuina.
Ae o le lē maopoopo o le HRPP na laga ai foi e Palusalue ma se lagona i le faaiuga a le taitai o le HRPP ua faamalolo ai le tofiga minisita lagolago o le faipule o Alataua i Sisifo le tofa Lafaitele Patrick Leiataualesa. O le talitonuga o le taitai o le Itu agai ua fai si mamafa o le faasalaga o le alii faipule ae o se faaletonu sa mafai lava ona fofo i le lotoifale o le HRPP.
E iai nisi o faipule o le HRPP sa iai le matega o le taitai o le Itu agai sa tatau ona faia muamua i ai se faasalaga faapea, peitai sa ia lē mafai ona faailoa i tusitala poo ai ia faipule. I le taimi o avea o ia ma sui lagolago o le HRPP sa tuliloaina ai i se fesili Palusalue pe sa iai ni tulaga faapea na aliali mai.
O lana tali sa matuā maopoopo le vaega faaupufai. O le a tuliloaina se finagalo o le taitai o le Malo i le mataupu lenei pe a toe faaolatia mai i fanua lona lato i le ea.