“Ua aumai le lipoti a leoleo ia te au, ma o le tulaga lena ua oo i ai suesuega”..Minisita o leoleo
O le femoumouai o faamatalaga mai leoleo i le tulaga tonu ua taunuu i ai le mataupu i le Sui palemia le tofa Fonotoe Nuafesili Pierre Lauofo, ma se tasi o ana minisita lagolago le afioga Muagututagata Peter Ah Him, na saili ai se avanoa i le afioga i le Minisita o leoleo le afioga Sala Fata Pinati.
O le Aso Lulu, 6 o Novema 2013 na maua ai le avanoa ma fesiligia ai le alii minisita i se tulaga ua taoto ai le mataupu ua vavao ai lagona o tagata ae ua salalau ai foi le tele o lipoti.
E pei ona silafia o le tau amataga o le masina o Oketopa na taofia ai e leoleo na tiute i le po le taavale a le minisita lagolago o Muagututagata ina ua liliu tu i se vaega o le alatele i le taulaga ae lē faatagaina ona liliu ai se taavale poo se U-Turn i lea vaega o le auala.
Na oo atu i ai ma le taavale a le Sui palemia ma fesiligia alii leoleo na tiute i le mafuaaga ae faapea mai leoleo na fesiligia ai e le Sui palemia le au tiute pe aisea e lē o ai e molia muamua se isi alii leoleo sinia (taofia le suafa) sa latou inu. Na valaau ai ma le Sui palemia i le minisita lagolago e alu lana taavale.
O le vaega tonu lava lea na mafua ai loa ona amata salalau mai se lipoti ma polili mai ai i nisi mau lipoti ma faamatalaga a le Sui palemia ma le minisita lagolago sa faasalalau i ni lipoti a se tasi o nusipepa i le atunuu.
O le saunoaga mai a le minisita ua oo atu ia te ia le lipoti o suesuega a leoleo ma ua ta‘ua ai o le a molia le Sui palemia ma se tasi o ana minisita lagolago. Na faailoa mai e le minisita o leoleo o le lipoti foi lea ua maua e le taitai o le Malo le afioga i le Palemia.
Na mae‘a le feiloaiga ma le minisita i le aso lava lea, ona fesootai ai lea i le sui Komesina o le matagaluega le susuga Leiataua Fata Aviga Salale. Na ia saunoa mai ai e sa‘o o loo agai leoleo e inform le Sui palemia ma le minisita lagolago o laua lea ua molia.
O le isi saunoaga a le Sui palemia e tasi le moliaga o le faalavelave lea i le tiute o leoleo, ae o le minisita lagolago o le lē usitaia lea o aiaiga o le tulafono o le faaaogāina o le masini mānava poo le breathalyzer.
Peitai ina ua lipotia lea tulaga i le aso lava lea ma le aso na sosoo ai, na toe faataalise mai se pepa o faamatalaga mai le ofisa o le sui komesina ua faaalia ai lona teena o le lipoti i lana faamatalaga ua sese le lipotia o ana faamatalaga poo ua misquote.
O se tulaga ua faanoanoa tele ai lenei tusitala ona o le toe suia o le faamatalaga a le sui komesina.
Ina ua toe faailoa e lipoti o faamatalaga lava ia a le sui komesina na ia faamaonia ai le finagalo o le minisita o le matagaluega i le faia o moliaga o le Sui palemia ma se tasi o ana minisita lagolago, e lei toe aumaia se finagalo o Leiataua Fata Aviga Salale i le mataupu.
O le feiloaiga a tusitala ma le Sui palemia i le Aso Faraile na tea nei i le faalauiloaina o le faamoemoe o le au gaosi oloa i le latou faaaliga oloa i Niu Sila lea e faia i le vaiaso nei i le taulaga faatau i le pitonuu o Magele i Aukilani i Saute, na fesiligia ai le Sui palemia pe na te talia ni fesili i nisi o mataupu aemaise lava le mataupu o loo aafia ai ma lana minisita lagolago e pei ona sa laga e le itu agai i le latou fono ma tusitala i le Aso Faraile lava na tea nei.
O le finagalo o le Sui palemia afai o ni mataupu ua mae‘a ona saunoa iai le Malo ma ni mataupu o loo faia i ai ni suesuega, e lē avanoa sona finagalo ona ua uma ona tali i ai le Malo.
