Lē lava le okesene le mafuaaga o le maliu o Frank Wulf

Ua iloa nei le mafuaaga na uma ai le ola o le pepe a le tina talavou o Henrietta Wulf o Moamoa ina ua mae‘a ona suesueina molimau a leoleo i le suesuega o le mafuaaga o le maliu poo le inquest sa faatautaia i le faamasinoga faaitumalo i le lua vaiaso ua mavae.
O le taunuuga o le suesuega ua faailoa ai e le afioga i le faamasino Vaepule Vaemoa Vaai, o le lē lava o le okesene e mānava ai le pepe a o lei fanau e mafua ona ua pa‘ū muamua i lalo lona uso poo le pute, o le mafuaaga lea o le uma o le ola o le pepe o Frank Wulf.
Ua faaalia i le faaiuga o nei suesuega o se folasaga tusitusia a le faamasinoga e lagolago ai lana faiuga i le mafuaaga o le maliu o le a mafai ona taoto mai ai se ata manino o ni fautuaga e lē tatau ai ona tulai mai se isi mataupu faapenei i le lumanai.
O le suesuega lenei na mafua ina ua salalau ni lipoti na faailoa ai ni tuua‘iga a le tina ma le aiga o Henrietta faasaga i le faatinoga o le tiute o tausi soifua ma fomai i le taimi na taunuu ai le tina i le falemai seia oo ina ola pe fanau.
O tuua‘iga lava ia ua oo ai ma se tagi a le aiga u taoto nei ile faamasinoga lea e leo iloa poo afea e fofogaina ai. Ina ua maea ona fofogaina le taunuuga o suesuega a le faamasinoga ile mafuaaga o le maliu o le pepe, na faaalia ai e le tina o Henrietta i fafo o le potu faamasino, o le a sei talia le folasaga tusitusia a le faamasinoga o loo lagolagoina ai lana faaiuga ile pogai o le maliu, ona iloa ai lea o se isi laasaga o le a oo iai. E lei manino mai le finagalo o le tin ape o le a faaauau ai pea le latou tagi pe o se isi tulaga.
O suesuega na faia i le mafuaaga o le maliu na faafofoga ai le faamasinoga i molimau tuu fofoga faapea foi ona silasila i lipoti tusitusia mai fomai ma tausi soifua faatosaga agai i le mataupu, mai lava i le taimi na taofia ai le tina o Henrietta seia oo ina fanau.
E pei ona faafofoga i se molimau a alii fomai na tiute ma le tamaitai tausi soifua faatosaga na galue tonu i le taimi ua luluti tiga o Henrietta, na iloa e seela pe e lē o taoto lelei le pepe i lona taotoga e tatau ona fanau mai ai, i le muamua mai lea i lalo o ona vae ma lona nofoaga, ma e ta‘ua lea i le gagana faafomai o le breech.
O le mafuaaga foi lea ina ua luluti tiga i le taimi o le a ola Henrietta na mafua ai ona muamua pa‘ū i fafo le uso poo le pute, lea na mafua ai loa ona lē lava le okesene e mānava ai le pepe a o lei sau i fafo mai le manava o le tina. O le a tuliloaina pea lenei mataupu i se tulaga o le a oo i ai i le faamsinoga maualuga.