Amata aoaoga o le HIV/AIDS

O le vaiaso lenei ua faagasolo ai le vaiaso ua ave ai le faamuamua i le soifua manuia lautele o le atunuu.
O le taumafaiga ina ia unai atili le malamalama o le atunuu i le itu tau i le soifua maloloina, ma e eseese lava polokalame ua faagasolo auā le faatinoga o lenei taumafaiga a le Matagaluega o le Soifua Maloloina.
O le tasi o polokalame na amata mai i le aso ananafi o aoaoga ua patino i tupulaga talavou e faatatau i le gasegase o le HIV/AIDS.
O le aso ananafi na amata ai aoaoga a le Matagaluega i tupulaga talavou i le itupa o alii. O le 18 tausaga e oo atu i le 27 ia na valaaulia mai i afioaga taitasi mo lea faamoemoe ma le manatu laualuga o le Matagaluega ina ia agai atu i latou nei ma momoli le feau o puipuiga mai i lenei faama‘i i tupulaga o afioaga uma o le atunuu.
O le aoaoga o le aso ananafi e pei foi ona faaauau mai i le aso i le itupa o tamaitai o le taumafai lea e ave le faamuamua i le ola faamaoni ma tausisi i le paaga e tasi. O se feau ua tele tausaga o unai ina ia tau taofiofi ai le sosolo o lenei siama i tupulaga o le atunuu.
O le popolega tele o le matagaluega ona o lea ua vaaia le toatele o le tupulaga talavou ua maua i faama‘i o feusuaiga (sexually transmitted diseases) ma o se tulaga na ta‘ua e le Matagaluega e faigofie tele ona faaauau atu ai i le gasegase lenei o le HIV/AIDS.
I Samoa lava ia o le tausaga e 1990 na muai maua ai le tagata i Samoa ua aafia i lenei siama ma o se alii na nofo i Niu Sila, maua mai ai i le faama‘i ma faapea ai loa ona toe foi mai i Samoa.
O le suesuega ma faamaumauga o le 2011 na faapea ona maua ai ua oo atu i le to‘a 22 tagata Samoa ua aafia i le HIV/AIDS ma e to‘a 10 ua maliliu ae o loo soifua pea le isi to‘a 10. E toafā o lea aofai o le fanau laiti e i lalo ifo o le 4 tausaga le matutua.
E tele lava galuega ua faatino i le faalauiloa ma le agai atu o le matagaluega faapea isi faalapotopotoga ua patino a latou galuega i faalauiloa o le HIV/AIDS ina ia lava le iloa o le atunuu i le matautia o lenei gasegase, o auala ua maua ai aemaise o ā fesoasoani o loo iai mo soo se tasi ua aafia.
O le taumafaiga a le Matagaluega ina ia lava le iloa o le tupulaga talavou i lenei faama‘i ma ia taofiofia le sosolo faaafi o lenei gasegase i totonu o le atunuu.
O le aso lea e ave ai le faamamafa i le faatuputupulaia o le fanau teine ua faapea ona aafia i ma‘itaga lē manaomia ma o Samoa le isi atunuu ua laga ai popolega i le maualuga o le numera o tamaitai talavou ua aafia i faama‘i nei o feusuaiga.