E pei ona sa lipotia i la tatou lomiga o nai masina ua tuanai, le mae‘a ai o le uluai toleniga (training) sa faia e a‘otauina ai taitai o autalavou ma nisi o alo talavou o Ekalesia eseese, auā se tomai e mafai ona galulue faatasi ai ma le matagaluega o leoleo e faatino ni galuega mo le laveaina o alo ma fanau a Samoa ua avea train stations ma o latou aiga ma faatupu misa ai, ma nisi foi o nofoaga faitele e pei o shoping centres ma paka.
O fuafuaga faataotooto nei a le Samoa Community Leaders e pei ona faaigoa ai le mafutaga tuufaatasi a auauna a le Atua mai soo se Ekalesia o le Tovine, faatasi ai ma nisi o tamalii o galulue i matagaluega o maua ai fesoasoani mo tupulaga, ona o le tulai mai pea la o faaletonu i tupulaga Samoa i le aai o Melepone, ua finagalo ai le mafutaga e faaauau pea le a‘otauina o tamalii ma talavou auā lava le galuega laveai.
O le afiafi o le Aso Faraile na tuanai atu, na faamae‘a ai le training lona 2 ma tufaina ai tusipasi e pei ona sa tufaina e le malu maualuga o le malo le susuga ia Simon Stevens.
Na femolitai faafetai ma faamalo ia i latou uma na nafa ma le faamoemoe ua faataunuuina ma le manuia, ona tali ai lea o le sua i le sausage sizzle na saunia e le kalapu a le Liona (Lion Club).
