Pe a tau lau o se faamoemoe, ona muai momoli ai lea o le faafetai ma sii a‘e le viiga i le Atua, auā pe ana lē seanoa lana faatonutonu folau, e faivavale lava taumafaiga a le tagata.
O aso faapenei ua moni ai le upu a se tasi tagata ta‘uta‘ua, ‘O aa o aoaoga e oona, peitai e fua mai ai le fua e sili ona suamalie.’
Maeu le suamalie ma le tofo lelei i mātua, ae tainane le tapuaiga a aiga na lua.
E lagona le faafetai ona ua faaiu ma le manuia taumafaiga a le afafine ia Valelia Unasa. Sa a‘otauina muamua Valelia i le iunivesite a Aukilani (Auckland University) ma faamanuiaina ai i lona faailoga o le Bachelor of Commerce. Ona agai lea mo le sailia o lona faailoga faaloia sa a‘otauina ai i le iunivesite a Waikato (Waikato University) i Hemilitone, lea ua faaiuina ma avea ai nei ma loia.
O le Aso Faraile, aso 7 o Tesema 2012, sa faatino ai loa le faamoemoe i le Fale Faamasino Maualuga i Aukilani, e faaulufale ma talia aloaia ai nei Valelia e avea ma Loia e tulai i totonu o soo se fale faamasino i Niu Sila.
O le faaulufale ai o lenei alo o Samoa, o le a mafai ai ona avea o ia ma fofoga o soo se tasi ua molia i lalo o le tulafono, e pei o le finauina o ni moliaga tau le sauaina, poo le aveesea o aiā tatau ma saolotoga o tagata. Sa auai atu mātua ma aiga e molimauina lenei faamoemoe tāua mo Valeli; na auai atu foi si ona Tina Matua ia Foai Lesā Seaoga mai le afioaga o Saanapu.
Sa faaalia e le afafine ia Valelia Unasa le agaga faafetai i le Atua ona o le fesoasoani mai ia te ia e ui sa iai taimi e tau lagona ai le faavaivai, ae ua avea le mafanafana o le pa‘i mai o le agaga o le Atua ma faamalosiau ia te ia. Na ia saunoa: “Ou te fia faaleo so‘u agaga faafetai i nai o‘u mātua ona o le lagolago malosi mai i a‘u taumafaiga aemaise foi le la tatalo faifai pea i le Atua ina ia faaiu ma le manuia lo‘u taumafai.”
O Valelia o le alo faasino ia Unasa Malele Titie ma le faletua ia Ailini Unasa. O alofaaga ma faamanuiaga mo le tamaitai loia, mai lona uso ia Louise Marie, ma lona tuagane ia Andrew Unasa, aemaise fai ona aiga uma mai Samoa, Niu Sila, Ausetalia ma Amerika.
