E lei tuanai le vaiaso na mae‘a ai laugatogi ma faauuga a a‘oga i Samoa mo le faaiuga o lenei tausaga, ae fetaiai mātua o nai fanau o le ekalesia a Iesu Keriso o le Au Paia o Gata ai i Nono‘a Saleimoa ma se tala faanoanoa ona o ola o fanau a le aoga Aso Sa a le ekalesia na aafia i se faalavelave tau taavale i se tafaoga na alu i le Aso Toonai na tea nei, 8 o Tesema 2012.
O le pasi o le Jungle Boys na alu ai le tafaoga ma sa taamilo e pei ona faailoa mai e se molimau. Na ui ane i Lefaga ma oso atu ai i Matafaa le pitonuu tupito o Lefaga ma agai atu ai i le alatele o loo tau atu i Falelatai. O se vaega o lea auala na tupu ai le faalavelave a o faaifoifo i lalo le pasi ua lata i Falelatai.
Faaalia e le Komesina lagolago le afioga Leaupepe Fatu Pula, o faamatalaga na tuuina atu sa ta‘ua ai e fai si saoasaoa o le pasi a o faaifoifo i lalo, ma o le mafuaaga lea na oso ai i tua ina ua lē mafai e le avepasi ona faatonutonu le taavale, na mafua ai ona taavalevale.
E iai le talitonuga o le Komesina lagolago na sesee le pasi ina ua tifa i autafa ae e lei taavalevale faaumiumi, auā ana fai o se tulaga faapea na tupu e mautinoa e fai si ogaoga o se tulaga e tupu i le soifua o fanau na malaga ai.
E maua le fesootaiga i le Komesina lagolago i le po o le Aso Toonai na tupu ai le faalavelave e na o le toalua le au maliliu o le faalavelave. O le alii avepasi ma se tasi o tamaitai o le a‘oga Aso Sa e sefulufitu ona tausaga.
E eseese faamatalaga mai leoleo e pei ona sa faailoa mai e le Komesina lagolago o le sooupu o le matagaluega o leoleo ma falepuipui, ma faamatalaga mai se tausi soifua sinia i le falemai faaitumalo i Leulumoega-tuai na taunuu muamua i ai le au manunu‘a. O le faamatalaga a le tausi soifua, e 30 tagata na malaga i le pasi na avatu i le falemai i Leulumoega mo togafitiga.
Na faailoa mai foi e le tausi soifua sinia, e toaono i latou e tigaina manu‘aga ae o le isi vaega uma sa togafiti ma toe agai i aiga, ma le fautuaga ia agai ane pea mo nisi siaki pe a iai nisi tulaga e faalogoina i manu‘a.
O le avepasi ua maliu e 23 tausaga o lona matua, ma e tuuina atu lenei lipoti mo le faasalalauina o loo faia suesuega a leoleo ma e lei toe maua mai foi se faamatalaga i se tulaga ua iai le toaono o loo tigaina i manu‘aga mai lea faalavelave.
