Ua fautuaina e le kamupani o le Transam i Samoa le atunuu ina ia saili nisi kamupani vaa la‘uoloa e ave ai a latou uta ma faamomoli mo Samoa, ona o le tulaga ua aafia ai le faagaioia o le kamupani vaa o le Reef Group Shipping lea ua iai se itutino ua na pulea ana meatotino ma aseta ona ua faaletonu ana tupe maua.
O le vaiaso na tea nei na faaalia ai e se ofisa sinia o le Transam le tuai taunuu i Samoa o se tasi o vaa o le Reef Group ona na taofia i Fiti. “E iai lava le talitonuga poo ni tulaga tau tupe i ni aitalafu ma pili e lei totogia a lea kamupani vaa le mafuaaga”, na saunoa mai ai le ofisa sinia.
O le Aso Toonai aso muamua o Tesema 2012 na faatulaga e taunuu ai i Apia lea vaa ae na faatoa taunuu i le Aso Faraile na tea nei. “O le matou fautuaga lena o loo ave i kamupani i Samoa ma tagata, e sili le saili o isi kamupani vaa e aumai ai a latou uta ma faamomoli ma isi oloa, ona ua feagai le Reef Group ma ni tulaga lē mautonu”.
O le tasi lea o kamupani vaa e faalagolago tele i ai kamupani i Samoa faapea tagata mo le aveina o a latou faamomoli ma oloa, peitai ona o tulaga ua aafia ai ua faaalia ai e se tasi o faipisinisi e talosia i le faatauina e le Malo o Samoa o le kamupani vaa o le PFL (Pacific Forum Line) o le a foia ai faafitauli ua feagai nei ma latou i le fela‘uaiina o oloa aemaise o oloa e faaulufale i Samoa.
O le Reef Group o se tasi o kamupani i Niu Sila o loo umia e nisi ona sea poo shares e aofia ai ma se tasi o tamalii o le atunuu le susuga Laauli Michael Jones.
O le kamupani foi lea o loo pulea le kamupani o le Pure Pacifica Nonu o loo i Vaitele lea na latou folafola lo latou ave i Saina o uta o le sua o le nonu. Peitai ua ta‘ua i ni lipoti ua tapunia le kamupani ona o faaletonu ua aafia ai.
E lē o iai se faamatalaga mai le pulega o lea kamupani pe faapefea a latou fuafuaga e faatau mai le nonu mai le atunuu ma la‘u o latou sua i Saina ma isi maketi i fafo.
O se tasi o tamalii le susuga Masuisui Junior Pereira o loo avea ma pule o le Pure Pacifica Nonu, ma e lei manuia sailiga mo sona finagalo e tusa ai o le tulaga ua tulai mai. O le kamupani foi lea o loo aofia ai ma le susuga Laauli Michael Jones i le latou faiga paaga ma le Reef Group i Niu Sila, lea o loo iai le ofisa autū o lea kamupani.
