Na tuufaatasia e ala i le faaipoipoga le A‘oa‘o i‘u mai Malua, le susuga ia Henry Junior Ito ma lana manamea, le tamaitai faaipoipo ia Orepa Mulitalo. O le Aso Toonai, aso 8 o Tesema na faataunuu ai lea sauniga i le sakalameta o le faaipoipoga.
O tuaa o le alii faaipoipo, o le tofa ia Fata Ito mai Afega ma le tausi ia Taulafo Ito mai Sataoa. O mātua o le faato‘ānofotane, o lona tamā o le susuga ia Uelese Mulitalo mai Saanapu ma si ona tina o Roseta mai Samalaeulu i Savaii.
Sa taitaia le sauniga e le toeaina faatonu o le Matagaluega EFKS le susuga i le toeaina ia Rev Kerita Reupena, ma osia le feagaiga faatasi ma talosaga.
O le susuga i le faafeagaiga ia Rev Petaia Tuifao lea sa fafagaina le soifua tapuai o le alii a‘oa‘o ia Henry Ito, sa faitauina le Tusi Paia ma feagai ma le lauga.
O le sainiina o pepa o le ulugalii fou sa feagai ma le susuga i le faafeagaiga ia Rev Lance Tautiepa, o le faafeagaiga lea a le tamaitai faaipoipo. Na mae‘a le sauniga sosoo ai ma le faaafe a ekalesia e lua EFKS Westside ma Southside.
Sa fai ma Fofoga o le aso le tofa ia Maulolo Leaula auā foi faaaloaloga ma valevalealofa e ala i seleni paia. O le susuga i le tiakono o le ekalesia EFKS a Westside, le tofa ia Laufiso sa fai ma sui o le auvalaaulia auā se faafetai i le paia i aiga ga lua.
Na alo i le taumafataga ma silamaimoa foi le aofia i faafiafiaga a Aoga Aso Sa e lua (Westside EFKS ma Southside EFKS), ta‘ape ai le filialii i le agalelei mai o le Tapaau i le lagi.
