E 20 tausaga le matua o se alii talavou mai Safotu i Savaii na maliu i le po o le Aso Lulu ua mavae, 5 o Tesema 2012 i se faamatalaga a leoleo e faapea na faaoolima i ai ni taulelea se toalua o lona aiga.
Na faailoa mai foi e le sui sooupu o le matagaluega o leoleo ma falepuipui le afioga Leaupepe Lealaitagomoa Fatu Pula, na mafua ona faaoolima taulelea o le aiga i lē ua maliu ona e faapea na misa ma lona tuafafine.
O le faamatalaga lea mai leoleo o loo teena e se tasi o le aiga, le susuga Fonomaaitu Vani Tufuga, i le faamatalaga a lea tamalii e faapea, na logotala i le faalavelave ona vili lea i Safotu e fia silafia le mea ua tupu ona o le taulealea ua maliu sa nofo ia te ia i lo latou aiga i Sinamoga.
“Na ou vili i ai ona sa fia iloa se tala tonu o le faalavelave ma faailoa mai ai, o le alii ua maliu na ita ina ua faatonu atu e lona tuafafine e alu e fai le saka, le mafuaaga na alu ai i le isi aiga o matou e lē mamao ma lo latou fale ma e‘e”.
O le ita foi o le alii e pei ona faamatala lea sui o le aiga, na inu ai loa e lē ua maliu le fagu vailaau e fufulu ai fale o le pine o clean. O se vailaau e masani lava ona faaaogā e faamamā ai fola o fale, faapea faleui.
Na faaalia e Fonomaaitu na faufau e‘e le taulealea e pei ona faamatala lo latou aiga ina ua uma ona inu le vailaau, ma nanati ai loa i le falemai i Tuasivi lea na maliu ai lava ona o le malosi o le vailaau.
Na faaalia e le sooupu o leoleo o loo taofia alii e toalua o loo tuua‘ia i le maliu o lea alii talavou mo suesuega ma ua molia i le fasioti tagata pa‘ivalea. Peitai na faaalia e Fonomaaitu Vani, ua uma ona oo i le ofisa o leoleo ma faamatala i ai le mea tonu na tupu.
O loo iai le fuafuaga a leoleo e faatoa iloilo le mafuaaga tonu o le faalavelave ma le pogai na maliu ai lea taulealea pe a valaau moliaga o alii e toalua mai Safotu i le faamasinoga. O le taotoga faapitoa foi o loo faatali nei o le a iloa ai le mafuaaga tonu na maliu ai lea alii talavou. O le a tuliloaina pea lenei mataupu i le fia maua pea o le autū o le faalavelave.
Ua faailoa mai e se molimau faatuatuaina o le Aso Tofi 6 o Tesema na faia ai le sala a taulelea ua molia e leoleo i le nuu. Na faailoa mai e le molimau e faapea o le faasalaga e mafua i le tauvalea o le igoa o le nuu ona o lipoti ua salalau e uiga i le faalavelave.
