E momoe lava ma manū ae sau mala e atia‘e, o se tagi talatala lea a se tasi o toeaina matua o le atunuu i le aai o Kalaiesetete, a o tau faamatala mai i le tusitala ona lagona i le vaveao segisegi o le Aso Toonai 4.09.2010, na osofaia ai lona aiga i le luluina o le mafuie i totonu o le aai i le malosi e 7.1, atoa ma le fetagisi o tamaiti i le fefefe.
O le masina o Setema ua faamatalaina o le totogo a‘e o moemoe fou (spring) ae ua amata lava i le sasala o le manogi o le fugalaau mate.
Na matuā faateia le aai o Kalaiesetete i le taeao o le Aso Toonai lea na lulu ai le mafuie i le 4.36am a o momoe le toatele i malologa o le po, o le uluai osofaiga lea na fai sina malosi tele e 7.1 pe tusa ma le tolu minute, na toe sosoo mai ai ma le isi lulu e feololo teisi, lea la na faalogoina ai le maluelue o fale, tele ni nofoaga ma pisinisi ua afaina, aemaise le mavaevae o nisi o magaala ma auala.
O le mafuie e pei ona lipotia mai e le ofisa o le Civil Defence na osofaia ai le aai o Kalaiesetete e tusa ma le 40kilomita i le itu i Sisifo, ma o lona malosi e oo atu lava i Invercargill, ae peitai o le mafatia tele o loo aafia tele ai le taulaga o Kalaiesetete aemaise ona faoa aai tulata, faapea Ashburton ma Kaiapoi. O le Aso Toonai atoa na matuā tapunia uma auala i le taulaga o le aai o fugalaau mātala, tapunia faleoloa ma pisinisi, leai se gase ma e foliga mai o se aai ua mate, pau le pa‘ō sa faalogoina o taavale a leoleo, aemaise nai masini mo le kilia eseina o maa ma mea maamaai, ae se‘i tau saili pe lē o tanumia nisi i lalo o fale ua faaleagaina.
Na vaaia le fememeai o le toatele o tagata, o isi ua tapena fanau aemaise o survival kits ma uta i taavale, faapena pitonuu o loo tulata i matafaga pei o New Brighton ua tapena faavave ina ne‘i oso mai se sunami.
O le po o le Aso Toonai na faatonuina Kalaisetete atoa ia faatasia uma aiga i totonu o fale mai le 7pm i le 7am i le taeao o le Aso Sa, aua ne‘i toe alu se isi i fafo mo le saogalemu.
O se mea matautia lenei ua tupu i lenei augatupulaga, pei ona talanoa mai ai si toeaina lea faato‘ā faalogo ia i se mafuie, lea foi la ua ia matuā talitonu i le faalavelave na aafia ai Samoa i le masina lava lenei i le tausaga ua mavae.
E toatele pitonuu na afaina i le leai o se eletise ma se vai i le aso atoa, o loo iai pea nisi i le taimi nei a o lomia lenei tala e lei ola le latou vai. Ua galulue foi ofisa o le Salvation Army, Koluse Mumu e faatuina ni welfare centres mo tagata ua afaina aiga ma fia maua se fesoasoani pei ona iai Linwood, lea e toatele le mamalu o le atunuu e alaala ai ma Burnside.
E tusa ma le 20 pasene o tagata ua faaleagaina o latou fale ma lē toe aogā ona nofoia, ma o le tau aofai faaagaaga mo le faaleagaina o fale ma meatotino e tusa ma le lua piliona tala.
Lipotia mai o loo lē mapu pea le luluina o le fogaeleele i se malosi i le va o le 3.1 – 6.1 mo se taimi ae ao ina faaeteete ma mataala. E oo lava i le taimi o tapuaiga i le Aso Sa, sa lagona pea le luluina a o alo atu sauniga o le Aso Sa o Tamā.
Ua tapunia nei nisi o aoga i Kalaiesetete mo le lua aso, aemaise o fale faigaluega ma ofisa i totonu o le taulaga talu ai o le tele o magaala ua mavaevae, aemaise pisinisi ua tau maluelue taualuga o fale.
E lei oo nisi o sauniga lotu e pei o le St Pauls Pacific Trinity Church ona o le tapunia o auala i le taulaga, ua faaleagaina foi le falesa tele o Knox Presbyterian i le taulaga lava aemaise nisi o fale tetele ma le ta‘uta‘ua ua falala uma i le mafuie.
O loo fesiligia pea pe aisea na lē oo mai ai se faailoilo o le mafuie ina ia iloa e tagata, ae peitai o se tali mai alii saienitisi o loo nafa ma mataupu tau afā ma mafuie, o se faalavelave ua faafuaseia latou te lei mataituina foi i lo latou tomai, ae o se taimi o i luma e taumafai e saili tonu le faapogai.
Ae o le tala fiafia, faafetai e leai se soifua ua aveesea e ui ina iai pea se isi o tamā i le falemai e oo mai i le taimi nei.
