O le taamilosaga faapitoa lenei a aoga maualuga a Niu Sila mo tamaiti i lalo ifo o le 15 tausaga (U15) i le au lakapi ua filifilia mai pitonuu uma o Niu Sila, ma e tai lima tausaga ma tau aofai, lea sa talimalo ai le aoga a St Bede’s i Kalaiesetete i lona 32 ai lenei o taamilosaga mai le aso 30.08.2010 – 3.09.2010.
E 36 le aofai o kolisi na auai, amata mai Aukilani seia paia le motu i Saute, o le autū o lenei faamoemoe o le tuu avanoa i alo ma fanau i metotia ma agavaa e finauina ai le taaloga a o aga atu i luga o le au tele a le aoga (1st fifteen), aemaise ai o le tomai e faatonutonu ai le taalo fiafia ma le isi tamaititi aoga. O se avanoa tāua foi mo alii faiaoga mai ia kolisi mo le faalauteleina o le agavaa aemaise le silafia i lea foi taaloga ma le koleniina a o iai i le osoosoga o le olaga sogasoga i lenei lava taaloga.
E fa vaega (pools) na vaevae i ai ‘au, ma o le Aso Tofi sa faia ai Semi Finals i le va o Auckland Grammar ma Tauranga, faapea Napier High ma Christchurch High, tulai mai le iuga o le a fetaui Auckland Grammar ma Christchurch Boys High i le talita e saili ai le siamupini. Na matuā faatumulia le malae taalo a St Bede’s College i matuā aemaise le au tapuai na malaga mai Aukilani e maimoaina le fetauiga a nei au malolosi e lua i le aoauli o le Aso Faraile, ma o le taualuga foi lea o le mafutaga e pei ona iai i le vaiaso atoa. E ui ina louloua ma timuga lea aso ae na maitauina le loto finau o fanau i luga o le malae aemaise le au matamata ma nai mātua i le tapuaia o faiva o fanau.
E uma ane le ‘afa muamua o loo sikoa silia Kalaiesetete 14 – 6, o se taaloga mataina i le tau fai malolosi au e lua, iai foi nai taimi ua fai sina vesivesi laititi i luga o le malae, ma faasala ai loa i tua le tama aoga mai Aukilani. Na vaaia le taufai naunau uma e taofiofi le polo, ae masalo o le timuga e tele ai ina maseesee, fai si malosi o Kalaiesetete i le lineout, ae feololo foi si unai a Aukilani i le sikalamu. Na vaaia le toatele o alo saosaoa o le atunuu i le backline.
E toalua alo Samoa mai Kalaiesetete, o Antonio Tai Brown (centre) sa sikoa ma Maifea Taiulu mataina le tamoe malosi o le alii puupuu lea, o ia foi sa taitaia le haka a le latou aoga. O le alii o Viliamu (No 10) mai Auckland Grammar sa mataina tele lana taalo i le vave o le gaioi, masalo tasi lea Grant Fox o le lumanai.
E leai se ‘ai na maua i le ‘afa mulimuli ona ua mataalia uma au, ma ua sola ai Kalaiesetete ma le talita ina ua manumalo i le 14-6. Na faaalia le faafetai tele a le alii pule o lenei taamilosaga i aoga uma na auai i le lifiina o le taamilosaga i le isi sitepu e ala i le tomai.
O nisi nei o tama iloga o le All Blacks sa taalo i nei taamilosaga e pei o Richie McCaw, Ben & Owen Franks, Liam Messam, Zac Guildford ma Benson Stanley mai Aukilani.
