Tuufaatasia alo & fanau a Apulu Maeli ma Elieta mai Faleasiu

E iloa lava le fealofani o se aiga o le mafuta faatasi. E ui lava ina malolo atu i tuugamau tuaa sa faavaeina nei faatasiga, peitai e lē uma lava le naunau o augatupulaga fai a‘e e faaolaola tulagaaao ma fatu sa totōina mai e mātua i aso ua mavae.

O le Aso Toonai aso 28 o Aukuso, sa faia ai se faatasiga a nisi o alo ma fanau sa tupuga mai ia Apulu Maeli ma Elieta i Kuiniselani.

O le susuga lava i le faafeagaiga ia Andrew Feaveai, faafeagaiga Aso Fitu o le toe afio mai sa taitaia i se sauniga lotu, ma amata ai polokalame uma o lea faamoemoe e pei o taaloga ma femasania‘i ae faaiu i se taumafataga.

Sa faatāuaina i lea faatasiga le soifua maloloina e ala i faamalositino ma savaliga i le taeao ma le afiafi, auā sa saunoa se tasi o lupe faalele a le aiga, Pr Togamau Tuia, a lelei le aiga ma maloloina, e lelei foi ma maopoopo ekalesia ma faalapotopotoga o galulue ai.

O le tāua tele o lea faatasiga o le faanaunauga foi lea ma le autū i loto ma agaga o i latou nei, ina ia faafetaia pea le Atua i mātua lelei sa soifua ma ola a‘e ai.

Ua ono ai nei augatupulaga mai lava i le tamā ia Apulu Faiupu, ae o le tuufaatasiga i le masina na tea nei, e fefaamasania‘i ai fanau a le aiga, auā e mavae atu foi nei tuaa, a ua mafai ona iloa e le isi le isi aemasie alo ma fanau sa soifua a‘e i nei atunuu.

Sa mafai ona auai mai nisi mai Niu Sila, Sydney ma Adelaide faatasi ai ma Kuiniselani. O mātua o Apulu Maeli sa galulue faamisionare i Papua Niu Kini le tamā ia Apulu Faiupu ma Epenesa (LMS).

O le itu e faagaeetia ai lenei aiga, ona o loo tupu pea ma ola le fatu sa totōina e tuaa e ala i soifua auauna e tautua ai le galuega a le Matai e pei ona galulue ai Apulu Faiupu ma Epenesa faamisionare. O le tele o tamafanau fai a‘e o ni lupe faalele ia a le aiga o loo tauasuina le vai o le soifua.

I totonu o nisi o ekalesia aemaise le ekalesia Aso Fitu o le toe afio mai ma le Aso Fitu tutoatasi. Ua iai le faamoemoe o le aso malolo o le aso soifua o le tupu tamaitai o Elisapeta i le tausaga fou 2011, pe a tusa ai ma le finagalo o le Atua, o le a toe faia ai lenei faatasiga i Kuiniselani lava ona e iai nisi sa lē mafai ona auai mai ona o tuatuagia.