O le po o le Aso Toonai i Ausetalia na aloaia ai le manumalo mamao a le vaega faaupufai o le Soofaatasi a le Liberal i le faigapalota tele a Ausetalia ma avea ai lo latou taitai susuga Tony Abbott ma Palemia fou.
E 85 i le 57 na toilalo ai le vaega faaupufai a le Labour. Sa moomia na o le 76 nofoa e manumalo ai ae peitai na mamao ma sola ese le manumalo (landslide) e ui na o le iva (9) nofoa e lei mautinoa poo fea e agai iai (undecided).
O le po lava foi na faafetai ma faamalo ai foi le taitai o le Labour susuga Kevin Rudd mo le lagolago a le atunuu i lo latou vaitau ma faamavae aloaia mai polokiki i le mae‘a o lana faamanuiaga mo le faigamalo fou.
I lana saunoaga autu na faailoa e le Alii Palemia le toe iai o le faigamalo o Ausetalia i lalo o le puleaga fou ma ua toe tatala nei mo pisinisi. O se faamalamalamaga o lana saunoaga ua toe silasila nei le malo e suia tulafono sa saisaitia ai matagaluega ma pisinisi sa tupu mai ai faigata i tagata lautele ma le tausiga o a latou aiga faapea foi i pisinisi.
“O le taimi lenei ua maea faatosina (campaign) na faia e vaega uma na tauva.
O le taimi lenei ua amatalia le tautuaina o tatou tagata ma le malo, ma ou te fiafia tele e faailoa le ofo atu o la‘u tautua mo lo tatou atunuu. Ua tatau ona amata saoloto nei loa le mamalu lautele e faaalu le seleni aua o le a tatou maua se Kirisimasi fiafia,” o se saunoaga lea o le minisita fou faaolioli o Tupe ia Joe Hockey.
Ua amata foi le faamausali o tautinoga sa fai ma o latou anavatau o le toe fulisia o suiga e lelei ai le tamaoaiga ia maua ai e pisinisi i totonu lava o Ausetalia o tupe maua ma faatupulaia ai galuega mo le tausiga o aiga.
O le isi fuafuaga mamao a le faigamalo Soofaatasi a le Liberal ia amata toe iloilo ma faamalosia le paketi poo tupe e tausia le tamaoaiga o le atunuu ia oo atu i le isi sefulu tausaga o malosi pea ma gafatia ai le manao o le atunuu i aoga, falemai, femalagaaiga ma le puipuiga.
O vaega e lua o loo faamamafa i ai le fatufatuina o lenei tupe faaagaga a le malo tele e afua mai i pisinisi tetele (Businesses) ma le au gaosi Oloa(manufacturers).
E pei na vaaia i le fa tausaga talu ai ua tele na gasolo i latou nei i atunuu Asia ma Initia aua e taugofie. Na saunoa foi le Palemia ia Tony Abbott i totonu o leisi tolu tausaga o le aveese le lafoga o le Malala (Carbon Tax) faapea le Lafoga o Maina ma le koale.(Mining Tax) e amata atu ia Iulai o le 2014.
I le aotelega o folasaga a le faigamalo fou, o le autū lava ina ia faafilemu ma faatoatoa le tamaoaiga o le atunuu ma faamalosi atili ia maua ai se toafilemu. Talitonu Abbott ma le faigamalo fou a manuia itu nei o le a le toe faateia le mamalu o le atunuu ma nisi tulafono fou ma faafuaseia e afaina ai le tamaoaiga.
Ua nofo sauni foi le malo e feutagai ma kamupani tetele mai fafo e pei o Asia e faatamoe(invest) mai a latou seleni ma auina atu ai foi saofaga a le malo ma pisinisi e sailia mai ai ni faasiliga porofiti auā Ausetalia nei.
