Filifilia Tepatasi Fuiavailiili ma tama taaalo under 18 Kalapu lakapi (Redbank Plains RLFC)

Ua matua faafiafiaina mātua o le alii o Tepatasi Fuiavailili ina ua faamanuiaina i nisi o faailoga taualoa ona o taleni tau taaloga. O ona mātua, o lona tamā o le susuga ia Peresetene (Falelima) ma lona tina ia Talosaga Fuiavailili (Matautu Lefaga), ma o se fiafiaga tele ia i laua aemaise le fanau e saafi i se taumafaiga o si o la alo auā e ono faamalosia ai nisi o alo ma fanau finafinau i soo se taleni o taumafai e tausinio i ai ina ia tini i le sini.
E le mafai ona faigofie taumafaiga a alo ma fanau pe a aunoa ma se lagolago a matua aemaise aiga. Na mauaina e Tepatasi se talita tele mai le kalapu lakapi liki a Ipswich o le under 18 “Best and Fairest’’, e lolomiina ai lona igoa ona faasolo lea i tausaga uma, ma se isi ipu na ia mauaina o lana ipu tumau na tuuina atu aloaia o ia o le tama taalo lelei o le tausaga i le under 18 i le Redbank  Plains RLFC.
E faamoemoeina tele lenei alii e lana coach ma le ‘au i lana taalo tausaafia ma e ono sologa lelei lana sini ma taunuu lana miti tau taaloga e pei o le tele o isi alo o Samoa i Kuiniselani ua faamanuiaina i au kalapu, itumalo aemaise ‘au tetele a Ausetalia.
E toa 6 i latou tama o le latou fanauga ae toalua nai ona tuafafine ma si ona nephew e toatasi o Ehryk-Emileo. E fiafia tele le aiga e lagolago Tepatasi i taimi o ana taaloga o le ala foi lea e faaosofia ai le alii e faaauau lana taleni o le lakapi aemaise nisi o ona uso o loo taaalo foi i nisi o ‘au.