Toe sola le Aute Samoa i Aukilani ma le Siamupini

E vavao ma tapisa faafiafiaga ma isi polokalame o le vaiaso o le Teuila i luma maota o le Malo i le eleele fou i le vaiaso na tea nei, ae o loo vevela le taamilosaga taga polo a ‘au masii mai Niu Sila, Ausetalia, ma Samoa.
O se tasi lenei o taamilosaga ua silia i le sefulu tausaga o faagsolo, lea e faia i Niu Sila i le isi tausaga, sosoo ai ma Ausetalia, ona toe foi mai lea i Samoa.
O le tausaga ua mavae sa faia i Ausetalia ina ua maea Niu Sila lea la ua toe faia mai i le atunuu i le tausaga nei i le vaitaimi tonu o le Teuila.
E tele ‘au mai Samoa sa tausinio ai, ae o aumasii mai Niu Sila e tolu, e lua mai Ueligitone ma le tasi mai Aukilani o le au lea a le kalapu tapolo o le Aute Samoa o loo pelesetene ai le susuga Tavai Meni. O ia o se tasi e lauiloa i Niu Sila i lona siufofoga malu i taeao uma i le tautua a le Radio Samoa.
Peitai e le gata ina lelei i le tomai faasalalau, ae e siamu foi i le itu i taaloga aemaise lava la i le tapolo. O lana ‘au ua siamupini nei i le taamilosaga o lenei tausaga ma ua sosoo ai tausaga o umia pea e le Aute Samoa le ipu o le siamupini.
O le au tapolo a le Tausala mai Fagalii e taitaia e se tasi o tamafanau e lelei foi i le taaloga le susuga Poasa mai le afioaga o Fagalii. O le au lea sa mamao o latou ‘ai a o faagasolo le taamilosaga i le malae i Fagalii mo le aso e tasi, ae lua aso i le malae tapolo i Faleata lea e lesitala ai le kalapu o le Mauga Folau sa talimalo i le taamilosaga.
Na faaalia e le susuga Tavai i se faatalatalanoaga faasamasamanoa a o lei lauina togi o le tauvaga i le afiafi o le Aso Toonai na tea nei, e 15 ai sa mamao ai le manumalo o le au mai Fagalii aua o alii talavou sa taaalo ai o nisi lava e lelei tele le tai le taaloga.
Peitai ina ua toe taliu ane le taamilosaga i le malae i Faleata mo le aso mulimuli o le taamilosaga e tolu aso, na toe faaiila ai le taleni a le au tatā a le Aute Samoa, lea na maea ane ma tuufaatasi ‘ai, ua mamao lo latou manumalo.
Sa vaaia lava i lea afiafi a o agai atu sui o au taitasi mo le fiafia faaiu ma le lauina o togi, foliga faanoanoa o le au mai Fagalii ona sa iai lo latou manatu o le a sola ma le siamupini. Ua faafetaia ai e le pelesetene o le Aute Samoa le susuga Tavai Meni le lagolago a nisi o kamupani i Niu Sila i le malaga mai i Samoa o le latou au.         O ia kamupani e aofia ai le South Auckland Properties, Digicel i Niu Sila, ma le Henderson Cars i Takanini.
Ua ave foi le faafetai a le alii pelesetene i ‘au uma sa latou tausinio, ae pei lava o upu masani a le atunuu, ‘E le mua uma ni vaa’. O le faafetai foi mo le kalapu a le Mauga Folau mo le taligamalo i le tapenaina o vaega uma.