23 maua tusipasi soalaupule ai tagi faamasinoga fanua ma suafa

Ua iai nei se auaunaga ma se tautua fou e tagofia ai ni mataupu e faatoai i le faamasinoga lea ua ta‘ua o le Soalaupule poo le Mediation, e pei ona pasia ai e le Palemene se tulafono e faasino i lea auaunaga ua faatino e le mtagaluega o faamasinoga.
O le vaiaso nei na tufatufa ai tusipasi mo alii ma tamaitai e to‘a 23 ua faaaupegaina i tomai e faatino ai lea auaunaga ma e fulisia lava ia i latou o loo galulue i le matagaluega o faamasinoga.
O le soalaupule o se faiga lea e faatalatalanoa ai i le va o ni itu ua faato‘ai se latou mataupu i le faamasinoga ni faatalatalanoaga e saili ai se finagalo autasi e fofo alamea ai se feeseeseaiga e aunoa ma le fofogaina i luma o le faamasinoga.
Ua iai mataupu ua faapea ona tagofia i lea faiga ma ua taofia ai le suesueina e le faamasinoga o ia mataupu. E le gata ina iai i latou ua agavaa mo le soalaupuleina o ni tagi i le faamasinoga maualuga, ae ua faapena foi ona iai i latou e soalaupuleina ni mataupu e faatoai i le faamasinoga o fanua ma suafa.
O ni mataupu ua mae‘a ona faaulu i le faamasinoga o loo fuafua e tuuina atu i lea tautua fou e soalaupule ai, peitai afai e lē maua ai se fofo, e taunuu lava i le faaauau o na iloiloina i luma o le faamasinoga.