O le tamaitai Minisita o Paula Bennett sa taiulu i ai le tatalaina o le polokalame nonō mo nonogatupe fou ua atinaeina e le alii Palemia John Key, ma le faigamalo o loo iai nei. Ua faaigoaina lea poloketi o le Community Finance.
Ua faavaeina lea fale nonō tupe, i le manaoga o le malo, e tau taofiofi mai ai tagata lautele i le agai lea i nisi o kamupani nonō tupe o loo maualuluga tupe tului, poo loan sharks e pei ona faaigoaina ai.
O se pepa o faamatalaga sa faamatuuina mai, o loo ta‘ua ai e faapea, ua na o le nofoaga o le Salvation Army i Manukau, ma Henderson o le a faaaogāina e faagaioia ai ana galuega mo tagata lautele.
O se maliliega a le malo ma le faletupe o Niu Sila le BNZ, ua faamatuuina ane ai se vaega tupe e fesoasoani mo manaoga tau i nonoga tupe mo le Community Finance.
Ae i se vaai lauetele, ma suesue atili pea i lea polokalame, e faatatau i faamatalaga sa faamatuuina mai sa maitauina ai, o loo iai ona itu lelei ma o le a fesoasoani tele mo tagata lautele.
Ae peitai e foliga mai o le isi itu, e iai foi ona vaega e lē o atoatoa, ma o loo faanenefu pea e manaomia tele ona silafia e tagata uma. O le ala foi lea sa toe valaau ai ma toe fesiligia se tasi o sui o le National o loo fai ma fesootaiga o le Community Finance, ua na o le lua aiaiga ua faatulagaina ai ana tupe tului.
1. E mo nonoga tupe uma e oo atu i le $1000, o le a leai se tului, ae18 masina e toe totogi ai i ni peimeni taugofie.
2. O nonoga tupe uma e sili atu ma oo i le $5000, e na o le 6.9% lona tului, ae tolu tausaga e toe totogi ai, i ni peimeni taugofie talafeagai.
E lē o mautinoa foi i le taimi nei, pe fia le tupe e totogi i le vaiaso, pe a fuafua i le taimi e pei ona faatulagaina mai. E oo lava foi i ni aiaiga e pei o tulaga masani o nonoga tupe, e lē o mafai foi ona faailoa mai i le pepa o faamatalaga o loo taulimaina i lenei taimi.
O se tasi lea o mafuaaga, sa matuā manaomia tele ai nisi faamatalaga auiliili e uiga i lea lava faletupe ma lona tulai mai. Sa fesootai atu i lē sa tuuina mai lona suafa mo fesootaiga uma i lea lava poloketi ma sa fesiligia ai mo aiaiga faatulagaina. E oo lava foi i le faafitauli o loo feagai ma le toatele o tagata lautele i le tulaga o le afaina o suafa ona o nisi aitalafu sa faia muamua, e lei ma‘oti mai se tali.
Na pau lava le tulaga sa manino mai i le saunoaga a le alii sooupu o Simeon Brown, e faapea o i latou uma o loo umia le community service card, o le a agavaa mo ia nonoga tupe mai le Community Finance. O se faamatalaga e lē faamalieina ai le manaoga, ma le aano moni o le fesili sa tuuina i ai. Sa ia ta‘ua foi e faapea, o le a mafai ona maua ane nisi o faamatalaga auiliili pe a tatala le auaunaga i le masina fou.
E foliga mai i lea foi faamatalaga, ua na o se maunu o le faiga palota, ae lē o iloa poo fea tonu o taoto ai le mea moni. O le tamaitai Minisita o Alamanuia ma Puna‘oa, Paula Bennett, sa fai ma sui o le malo e tatalaina ma faalauiloa lea poloketi.
O le mea moni, sa tatau ona togi atoa mai le moa, togi mai ma le ‘afa, ae lē o le togi e Paula Bennett le moa, ae o loo uumau pea e John Key le ‘afa. Ua maitauina foi le tele o poloketi fou a le malo ua ave i ai le tamaitai Minisita lenei, na te faalauiloaina ma fai ma tagata pito i luma o le vaega faaupufai.
O se isi vaega e taulai pea i ai le vaai, e foliga mai ua tau popole John Key ma le faigamalo a le National i se avanoa e toe foi ane ai lana Minisita, Paula Benentt, ina ua vevela faiga faatauvaga o le faiga palota i le va o le tamaitai Minisita, ma se tasi o tamalii o le atunuu, o loo tauva mo le vaega faaupufai a le Labour i lea itumalo, le afioga ia Lemalu Herman Retzlaff.
Mafuaaga e agavaa ai mo nonogatupe
E lē o soo se mafuaaga e talia mo nonoga tupe; ua faatulagaina faapea o le faatauina o se taavale, poo le toe faaleleia ma le lipeaina foi o se taavale o loo iai. O le faatauina o meafale e pei ona nofoa, moega, pusa aisa ma ogaumu. O le totogiina o pili a fomai, o pili mo fanau aoga o isi ia o vaega tāua. O loo taulai i ai le vaai ma le faauneina o seleni. E le mafai ona nonō se tupe i mafuaaga e pei o maliu ma femalagaa‘iga poo tafaoga.
O le a silasila foi taiala o le Community Finance, pe gafatia e tagata uma o le a talosagaina nonoga tupe ona toe totogi tupe faaaitalafu. O lona uiga e foliga mai foi o le a iai lava itu faigata, o le a lē faamalieina ai manaoga o tagata uma e talosaga, aemaise lava i latou o loo taulai ma autu i ai le faamoemoe o le malo.
