Faamauina $27,200.00 mo le leitiofoni a le Penina o Asuisui – 2014
Avea lenei avanoa faaauro e auala atu i le nusipepa a le Samoa Times e momoli atu ai se faafetai faalēa‘ua‘u a lenei aufaigaluega.
Faafetai i le tofā o lea ua a‘e malo le sailigaipo nai Avalua. E le lava upu ma tala e momoli ai le agaga faafetai i le atunuu i Brisbane faapea nisi setete o Ausetalia sa valaau mai ai nisi o le atunuu, Sini, Melepone ma Canberra ona o lo outou agaga fia fesoasoani.
Ua moni ai upu masani, o le tofā na lupe, a o lea ua tau le ‘ai o ‘Alae. Ua mataina le seu na lagatila ae faapulou i le tualima ina ua taumasuasua a matou ipu, ua fata luga fata lalo i le aao mafola ma le titi faitama, fai uso, alofa lē faatuaoia ma le lagolago malosi e ala i le foai a le atunuu i le leitiofoni na faatagisia ai e Laulu se vaa ia goto i se seleni.
E tasi le vaiaso na faagasolo mai ai le leitiofoni a le Penina o Asuisui ona o se fesoasoani tau seleni auā le totogiina o taimi faasalalau, ae ua lagona le agaga faafetai o le aufaigaluega.
Pau a le tatalo ma le loto maualalo ia alofagia e le Atua la outou foai ina ia sautuaselau ona manuia i totonu o aiga taitasi aemaise i latou o le a faaoo mai a outou fesoasoani e pei ona tauofo mai.
O le tausaga muamua lenei ua ova atu ai se leitiofoni e tusa ma le $27,200.00 talu ona faamauina mai le 21 afe na faamauina i le 2009 ae i lalo laititi lava o le 19 na mafai ona aoina, na o sina vaega e lei faataunuuina la latou ofo ae o le toatele lava na mafai ona ofoina ma faataunuu le totogiina.
E pei ona silafia e leai ni tupe mai le malo se‘ivaganā leitiofoni e lē o mafai lava ona tali tualimaina le faatalauula atu. E le tuuina i lalo le agaga faafetai i le galuega faifai pea a le aufaipisinisi o loo faia i masina uma.
Faafetai auā o le agaga fiafia ma le faagaeetia e momoli atu ai le faafetai tele ia i latou uma sa foai mai a o faagasolo le leitiofoni a lenei leitio faatauvaa ia Aukuso 2014 ua faamauina ai le aofai e $27,200.00.
E le o ia te i matou ni auro poo ni ario e toe taui atu ai ae matou te tatalo i le Atua e saga liligi ona manuia e tele mo outou uma lava. Faamolemole lava o faleoloa nei e ao i ai lo otou aao foai. Faafetai tele i le galuega a le aufaipisinisi mo le faamaopoopoina o le aao foai.
Faamanuia le Atua i le aufaipisinisi ma la outou fesoasoani malosi:
(1) Runik Polynesian Town – Inala (Pei Niko & Ruth Burgess)
(2) Uncle Sam’s Take Away – Woodridge (Poulava Sam & Lorna Matautia)
(3) Sia’s Take Away – Slacks Creek (Sia & Joe Leofa)
(4) Apia 2’s Take Away – Crestmead (Tupa‘i Lealaitafea & faletua)
(5) Tausala Kitchen – Red Bank Plains (Ugapo Falaniko & Lupe, Muliagatele George Salā)
(6) JD Financial – Goodna (Delilah & Pepe John)
Pe valaau mai le telefoni: 0432 371 127 ona ta‘u atu lea o le numera o la matou teugatupe i le Westpac.
Alofaaga mo outou uma, tagata taitoatasi, le aufaigaluega paia a le Atua ma faletua aemaise nisi o Ekalesia, tamā ma tina matutua, Mafutaga ma Asosi aemaise o soo se tasi lava o loo agalelei mai. Faafetai foi i le aufaipisinisi mo le aoina o lenei leitiofoni. Faafetai! Faafetai! Faafetai tele lava!
Fiu Tamala Malatai Fiu (Faatonu & Staff a le Penina o Asuisui 1197am Brisbane)
