O se tasi lenei o taamilosaga ua agaigai atu pea i luma lona tāua aemaise ai lava le molimauina ai le tumau pea o le lagolagoina e le tele o kalapu Lakapi Samoa i totonu lava o Niu Sila lava latou. Ma o le tele lava o nei Kalapu e mai lava i le tele o afioaga i Samoa lava, o loo aumau ma faamautu i Aukilani nei.
E tele le sao o lenei faalapotopotoga i tausaga ua mavae mai lava i le tau faafaileleina o le taaloga o le lakapi e oo atu lava i taamilosaga tetele, ma avanoa o loo fesoasoani ai i le Iuni Lakapi Faatamā i Samoa, faapea foi avanoa o loo atia‘e ai afioaga o loo tumau pea le fiafia i lenei taaloga o le Lakapi e oo mai i le aso.
O le Aso faraile la na se‘i mavae atu, na faatumulia ai le nofoaga a le Otahuhu Rugby Football Club i Otahuhu i le sauniga e le gata i le faalauiloaina lea o le taamilosaga o le 2014 ae o se avanoa tāua e talosia faapitoa ai le taamilosaga o le 2014 ina ia agalelei le Atua ma faataunuuina lelei i le fiafia.
I se feiloaiga ma le Peresitene ia Aiolupotea John Roache na ia ta‘ua ai le lava tapena o fuafuaga uma o le taamilosaga o lenei tausaga 2014, ma faafetaia ai le lagolago a Samoa aoao auā lava se manuia o alo ma fanau a Samoa i le lumanai. I le uluai taaloga o le talita i le faaiuga o le vaiaso nei e foliga mai o Au malolosi lava mai i le motu tele i Salafai lea o le a feiloai i le taaloga o le talita ae maimoa Upolu i le afiafi.
E sefulu ma le ono Au ua mautu o latou avanoa i le taamilosaga o lenei tausaga 2014. Na saunoa Aiolupotea John Roache ua talafeagai lelei lava lea avanoa o loo faataga mai e le Auckland Council mo malae o lenei tausaga.
Talosia ia le amataina aloaia o lenei taamilosaga i le Aso Toonai a sau nei.
