Ua faamaonia e le Kapeneta le tofiga o le Afioga Auseugaefa Mafaituuga Faatili Tumaifale Vaasatia Poloma Komiti e avea ma Konesula Aoao o Samoa i le motu o Amerika Samoa, mo le umi e tolu tausaga.
O lenei tofiga sa tauaveina talu ai nei e le Afioga Mataafa Tomai Esera. O le Afioga Auseugaefa sa tautua muamua foi mo le Malo i le tofiga o le Ofisa Sili mo le Matagaluega a le Palemia ma le Kapeneta mai le 1997 e oo i le 2009.
Na galue foi o ia mo le South Pacific Commission i Noumea mai le tausaga 1992 – 1996. O le tausaga e 1974 na amata galue ai le Afioga Auseugaefa mo le Malo i le nusipepa a le malo, le Savali, faapea ma le Ofisa o Mataupu tau i le Va i Fafo.
Talu mai le tausaga e 2012, na seei ai Auseugaefa i le nofoa o le Faatonu mo le Samoa Life Assurance Corporation, ma e tele foi isi komiti i totonu o le atunuu ma komiti faaitulagi sa galue ai lenei tamalii o le atunuu.
O Auseugaefa e mai afioaga o Fusi ma Tafitoala Safata, faapea ma Faleu Manono. O ia o se tasi o sui auai o le Ekalesia Metotisi i Samoa, ma ua faaipoipo o ia ma e toalima o la alo.
