Taunuu moemitiga a Ailolo Togisia Filimaea Fauea ma le faletua ia Rosaline
O le faamoemoe ma le manaoga sa taoto i loto ma agaga o tamafanau Samoa o le taumafai e atinae pe fausia se isi faavae fou o ni galuega e feosasoani ai i o tatou tagata. Ae peitai o le fefe ma le tele o lagona tutupu sa avea lea ma faitotoa tapuni o le laasaga fou ua aumai.
O se alafua e lei fuafuaina i se tausaga se tasi ae sa nofo ma mafaufau ma tuu atu pea i le Atua i se aso ma se taimi e faatauuina ai lenei manaoga. Ae o le tala a le Tusi a lē atinae e Ieova le fale e galulue fua i latou o ē atinae.
O le sini tonu lea ma le faamoemoe maualuga o le tofa ia Ailolo Togisia Filimaea Fauea ma le faletua ia Rosaline, sa iai i le Aso Toonai ua mavae, 21 o Fepuari i le la ofisa e fou ua faaigoaina o le Pacific Cargo. Ua faavae ma faataunuu e le Atua se manaoga, o le fia faatuina lea o se la kamupani e fesoasoani ai i o tatou tagata i uta ma faamomoli e auina atu i Samoa aemaise nisi atunuu o le Pasefika e pei o Tonga ma Fiti.
O le tatalaina ai o lenei ofisa i le Aso Toonai, 21 Fepuari 2015 na tumutumu ai aiga, uo ma ē masani aemaise o paaga a lenei aiga e molimau le taumafaiga a lenei tamalii o le atunuu ma lona faletua. O Father Ikenasio Vitaliano mai le Palisi a North Shore na saunia le faapaiaina lenei kamupani fou.
Ae o le tuaa o le faletua ia Rosaline le tama ia Fiu Sanonu Falemai sa ia ootiina le lipine ma faaulufale le auvalaaulia e maimoa i le maota fou ua iai. O se fiafiaga i le toatele o le atunuu na molimauina lea faamoemoe o le saili malo ma le finau o o tatou tagata ia maua ni kamupani e pulea lava e tatou tamafanau.
O le mae‘a ai o le tatalaina o le fale na sosoo ai loa ma le taumafataga ma faaiu ai loa i upu mulimuli ma le faamanuiaga a le taitai o le sauniga ia Father Ikenasio Vitaliano.
O le susuga ia Ailolo Togisia Filimaea Fauea na galue muamua i le kamupani o le PFL i Niu Sila nei i le 17 tausaga faatasi ai ma lona faletua ia Rosaline, o se tasi sa avea ma faauluuluga o lenei tautua. O se aiga ua lava le silafia ma le iloa i le faatinoina o lenei galuega ma o le mafauaaga foi lena ua a‘e ai se tofa ma se faautautaga loloto ua tatau ona laasia se isi sitepu fou o le soifuaga.
O le faamoemoe maualuga o lenei auaunaga o le fesoasoani i o tatou tagata aemaise o se manuia mo aiga nuu ma ekalesia. O lenei kamupani o loo i le tuatusi, 3/2 Camp Road i Mount Wellington.
