I le finauga a ‘au e lua i le po o le Aso Lua o le vaiaso na tea nei, na faasoa ai manatu i le mataupu ua faaulutala, “O loo ola ma mauaa le tautua i totonu o Niu Sila”.
E ui ina faigata le filifiliga o le faaiuga a susuga a faamasino, ae na o le tasi lava le maka na sili ai le ‘au a le komiuniti, ma ua toe toilalo foi le taumafaiga a le ‘au a le AUT i le taamilosaga i lenei foi tausaga 2013, lea na taitaiina e le tamaitai o Salainaoloa Wilson, o le sui faigaluega a le AUT.
Na saunia e le susuga i le faafeagaiga Uesifili Unasa se timaiga faaleagaga mo lea po o le tauvaga, saunoa ai foi le susuga i le Konesula o Samoa i Aukilani, Faolotoi Reupena Pogi, aemaise le faipule o Magele, Su‘a W Sio.
Sa maualuga ma lava tapena sauniuniga o lea po e pei ona faatautaiina le polokalame e le afioga Salā Faasaulala Tagoilelagi Leota, aemaise le maeu foi o felafolafoaiga a sui tauva o ‘au e lua, ae ua toe siamupini foi le ‘au lea na taitai e le susuga i le faiaoga o Tauanuu Perenise Tapu ma lana ‘au, Tuuu Mary Autagavaia, Semau Melaine Sagala, Asiava Tuipe‘a.
E toatele malo faaaloalogia a le afioga i le polofesa a le AUT, Le Tagaloatele Peggy Fairburn Dunlop. O se tasi o ana malo, na auai ma faasoa i lea po, o le afioga Tunumafono Apelu Aiavao, ua loa lona soifua tautua mo Samoa, e auala mai i ana tusi o loo faaaogāina i le tele o aoga ma le tautua faatusitala ma isi auaunaga e tele.
Sa tuu avanoa foi mo le au potopoto e faaali manatu ma faasoa i le mataupu, faapea foi ona iai se sao mai le tupulaga talavou, sa auai i lea po.
O se feiloaiga tāua le faamoemoe na tapena e le AUT, e lē gata mo le faaolaolaina o le tatou Gagana Samoa, aemaise le olaga aoaoina, ae o se avanoa tāua foi, e fesootai ai sui eseese mai matagaluega, aoaoga, auaunaga, ma soo tagata lautele, e faasoa ma fetufaai manatu, ma faalelei atili le va fealoai ma le komuiniti.
