O tupe lafo faamomoli i aiga i atunuu o le Pasefika, e telē so latou fesoasoani i le atinae o le tamaoaiga o atunuu o le Pasefika.
Ma o le fesoasoani tele ua saunia e le Digicel e ala i ana polokalame faaonaponei ua matuā vave ma faigofie ai ona lafo tupe a nai o tatou tagata Pasefika o loo galulue i Niu Sila ma Ausetalia, auā i latou o loo faatali mai aiga i atunuu moni.
O Oketopa o le 2011 na amata ai ona faalauiloa lenei auaunaga tāua a le kamupani telefoni lea foi ua iai ma lana tautua tau lafotupe, mo i latou o loo alala i Niu Sila ma Ausetalia.
O lenei tautua vave ua le toe moomia tele ai ona tau fealuai se isi ma se atotupe mafiafia lea foi e ono lamatia ai le soifua mai tagata faomea. Ae o le faaaogā o le telefoni feaveai, pe afai ua lesitala se tasi i le auaunaga lenei a le Digicel, le Digicel Mobile Money (DMM), ua matuā faigofie ai ona lafo tupe i aiga, pe totogi ai foi pili iinei lava, ma toe fafaga atili ai le credit mo isi tagata o manaomia mai lena fesoasoani.
I le 2011 lea na tatala aloaia ai lena auanaga a le Digicel e faaaogā ai lana website, e nofonofo ai lava le tagata i lona maota i Niu Sila ma Ausetalia, ma lafo se seleni i lona aiga i Tonga, Samoa poo Fiti. Sosoo ai ma le isi faafaigofie atili ua mafai foi ona alu e totogi se faatau i nisi o faleoloa i Niu Sila ma Ausetalia, ma faaaogā foi lena taimi e lafo ai foi ma seleni i aiga i le Pasefika (over the counter).
Lona uiga poo le ā lava le taimi e valalau mai lou aiga mo se seleni, pe te lei oo i le fale ae e na ona e agai lava i se faleoloa lea ua faatulaga ai lea auaunaga a le Digicel, ma lafo loa le seleni.
O le taimi nei, e silia ma le 21 faleoloa faapena i Niu Sila o loo faatulaga ai lena auaunaga a le Digicel (over the counter) mo le lafoina o seleni i aiga i atunuu o le Pasefika e pei ona ta‘ua i luga.
Ua faalautele atili nei foi le tautua fesoasoani a le Digicel, e ala i le faapaaga ma le kamupani lea o loo faafaigaluegaina mai tagata o le Pasefika mo galuega faavaitaimi i faatoaga, le Johnny Apple Seed i Hastings, e pei ona amata ai lea tautua i le aso 19 o Tesema i le tausaga talu ai, 2012.
O le Johnny Apple Seed e toatele naunau foi tagata Samoa o loo faigaluega ai i galuega faatoaga faavaitaimi i tausaga taitasi. Lea la ua faafaigofie ai nei le auala e lafo ai tupe a nai tagata faigaluega a o iai i Niu Sila, mo nai aiga o loo faatali mai Samoa.
O le lelei o lenei faiga, e le tau manaomia ai ona fai se aso malolo e sau ai i le taulaga i se faleoloa mo le lafoina o tupe i aiga, ma lē tau manaomia ai foi le totogi o se tau telē e lafo ai le tupe i aiga.
Ae o lea ua faatulaga ai lava i le nofoaga o le kamupani o loo faigaluega ai, le auala faigofie e lafo ai tupe i Samoa. E le gata i lea, o le auaunaga foi lea a le Digicel ua faigofie ai tagata faigaluega nei ona seve a latou seleni ma faaputu lelei a o faagasolo taimi o loo galulue ai, na ona oo lava i le taimi o le a toe foi i Samoa, lafo sa‘o ai lava ae faatoa tala i tua pe a taunuu i Samoa.
Ma sa faagasolo foi ni aoaoga mo i latou sa sauni e malaga mai Samoa i Niu Sila mo nei galuega faavaitaimi, ina ia faamasani i le auala e lesitala ai mo le faaaogāina o lea tautua, ma sa iai le pule o le Digicel i Ausetalia, Joseph Horn-Smith, e faataitai le faigofie tele ona faaaogā ma faailoa foi le tele o aogā o lenei faiga, ma faailoa foi le tele o vaega i Samoa lea ua faatulaga e tala ai i tua nei seleni faamomoli.
Na toe faaauau atili lea fesoasoani ina ua taunuu mai le au galulue i Niu Sila, ona faafeiloai lea e le alii pule o le Digicel i Niu Sila, le susuga Anthony Mika, ma e tele taimi e asiasi ai le alii pule i nofoaga o loo galulue ai nei tagata faigaluega, e fesoasoani atili e faasino le auala e lafo ai latou seleni.
E ese mai lenei tautua ae ua lauiloa le Digicel Money i le tele o ana faalauiloa o loo faagasolo pea i masina taitasi lea ua tele ina manuia ai o tatou tagata Pasefika aemaise foi o tatou tagata Samoa, e lē gata i faailoga tupe i se‘i e fai, ae o nisi faailoga o ni malaga fua i Samoa, i le tau lava o le lafo o se seleni i aiga, pe toe fafaga credit o telefoni.
E tele auaunaga ma tautua a lenei kamupani telefoni ua iloga ona faamanuiaina ai le toatele, ae o loo fiafia foi le aufaigaluega e fesoasoani atili mai e faamalamalama ma faamatala le faigofie o le auala e faatino ai a latou auaunaga pe a faafesootai atu i ai.
Ua iai le upega o fesootaiga www.digicelmobilemoney.com e fesootai ai i soo se tagata, faapea foi i tuatusi i le facebook: “Digicel Mobile Money”, pe fesootai sa‘o ia Chris Tuia i le telefoni i Ausetalia (Diaspora Manager, Queensland), i le +61421 346 112.
