Toe fofoga ia Tesema faamasinoga o tuuaiga alii faipule o Sagaga le Falefa

Ua toe tolopo seia oo atu i le aso 1 o Tesema le tuuina atu i luma o le Faamasinoga Faa-Itumalo o se tali a le afioga i le faipule o Sagaga le Falefa, le Afioga Solamalemalo Keneti Sio ona o moliaga e lua o le taumatau e faaoo le oti.
O ni moliaga na tulai mai ona o se feeseeseaiga ua taua i le va o le ua tagi, o Sauleone Solomona o Faleula ma le ua molia.
Faaalia e lipoti o le tagi a Sauleone, ua ia tuuaia ai le afioga i le faipule i lona taumafai lea e faafefe o ia e ala i le fanaina o lona maota i le ogatotonu o le tausaga.
Faaalia e Sauleone ia tatou lipoti, o se mataupu sa lotea i luma o le Faamasinoga o Fanua ma Suafa, lea e masalosalo na tulai mai ai lava lenei faiga tau faamatau ma na faasala ai foi lo latou aiga ona o le mataupu lea i luma o le Faamasinoga o Fanua ma Suafa.
O se tulimanu o le fale o Sauleone i Faleula lea na ia faasino i Tusitala ina ua tulai mai lenei faalavelave, na maua ai le pulufana o le laau malosi lea na tai atu i lona fale ma fana atu a o iai lea alii ma lona aiga i totonu o lo latou fale. O le tagi la a lenei alii na ave i leoleo, mulimuli ane ua ia tuuaia Leoleo i le faatuai ona ave o le mataupu i luma o le Faamasinoga.
O le tali a le Komesina o Leoleo ina ua tapa se faamatalaga o lenei faitioga, e le faapea o le tuai ona o le faipule ua faia i ai le tagi, ae ona o loo tele ma anoanoai isi mataupu na muamua atu i le tagi a Sauleone, e tatau foi ona faatino e Leoleo, ona faatoa oo ai lea i lea mataupu.
Na alu lava Sauleone ave lana talosaga i le Faalapotopotoga o Toomaga mo e Puapuagatia ma toe faaulu mai ai loa e ala i lea faalapotopotoga lenei mataupu.
O le vaiaso la lea na tea nei na tulai ai le alii faipule i luma o le Faamasinoga Faa-Itumalo.
O le alii loia o Patrick Fepuleai lea o loo tulai mo le alii faipule, o ia foi o le Minisita Lagolago o le Matagaluega o Aoga, Taaloga ma Aganuu. Sa talosaga leoleo i le Faamasinoga ina ia tuu atu ni vaiaso se tolu sei faamaea lelei ai suesuega o lenei mataupu.
Ua lapataia foi le Afioga Solamalemalo Keneti ina ia aua nei ona fesootai atu i molimau o le mataupu, o tagata ia ua taua e Sauleone na fafau faatasi ma le alii faipule e faamatau o ia.
Ua tatala le avanoa e malaga ai i fafo le alii faipule, pe afai e moomia lona malaga i fafo i mataupu faale-Malo ae ua faatonuina e toe tulai i le aso muamua (1) o Tesema aua le fofogaina o sana tali i moliaga e lua e pei ona tuuaia ai o ia.
O Solamalemalo Keneti Sio o se tasi ua silafia e le atunuu i le taaloga o le Lakapi, lea foi na avea ai o ia ma se tasi o le au lauiloa a le Manu Samoa i le taitoa 7 lea na manumalo ai Samoa mo le uluai taimi i le Ipu o le Hong Kong 7s.