Valoia e toe suipi le HRPP

Ua uma le fono a pati faaupufai laiti o le Tautua Samoa, Pati a Tagata le People’s Party, ma le Samoa Party, ua le mafai ona tuufaatasi i lalo o se faamalu e tasi ma se igoa e tasi, e pei ona tatalo i ai nisi o nei vaega faaupufai e tolu. O se taunuuga ua fesiligia ai nei tapenaga a nei vaega faaupufai mo le palota tele o le 2011, pe faamata e mafai ona latou faatoilaloina le HRPP.
“Ou te tautino atu e le taua se igoa o se pati ae taua le galulue faatasi o matou uma, ona maua lea o le auga o le faamoemoe ia sui se faigamalo”, o le saunoaga lea a se tasi o sui matua e lagolagoina le manulauti o loo tulimatai e pati faaupufai nei e tolu, o le tulai mai e faatautaia se faigamalo fou.
Faaalia e le Peresitene o le Tautua Samoa, le susuga Papalii Panoa Tavita Moala, e le mafai ona tuufaatasi pati ae ua malilie e galulue faatasi.
Fai mai se tasi o sui lagolago, sa laga i le fono a nei vaega faaupufai, lea e lei auai le taitaifono o le People’s Party, le Susuga Mapusua Toleafoa Solomona To‘ailoa, se igoa e tuufaatasi ai.
Sa finau le Tautua Samoa o le latou igoa ua lauiloa i le lalolagi ona o faamasinoga talu ai nei ua manumalo ai, aemaise o finauga iloga ua luitauina ai pulega a le HRPP.
Faaalia e lea molimau e le maluelue mai sui o le Samoa Party e faaaoga lea igoa, ae mananao e sili pe a alu pea le itu ia e tapenapena i lalo o lana igoa na faavae ai, ae ia galulue faatasi.
O lona uiga afai e manuia tapenaga, ma maua ni sui manumalo i le palota o le 2011, e mafai ona maua ai se fuainumera manumalo, o le a ono tulai mai se faigamalo soofaatasi poo se coalition government.
O le faigapalota o le 2006, e lima pati faaupufai sa lesitala ma taufetuli o latou sui faatutu i le faigapalota.
Sa tasi foi le auga o faatosina a ia pati uma, ia faatoilalo le HRPP. Peitai o le taunuuga o lea faiga filifiliga e na o le Samoa Democratic United Party poo le SDUP sa taitai ai le sui faipule o Lefaga ma Faleaseela le afioga Le Mamea Ropati, na manumalo o latou sui tauva e toa sefulu.
O isi pati uma e lei manuia e aofia ai ma le vaega faaupufai o le Samoa Party o loo taitai ai le susuga Su‘a Rimoni Ah Chong.
E vevesi faatosina o le palota o le 2006 e lei fanau mai le vaega faaupufai o le Tautua Samoa ma le People’s Party.
O le Tautua Samoa na amata ona faavae e sui faipule tututoatasi ma sui faipule o le SDUP na solomuli ese mai le taitaiga a le afioga Le Mamea Ropati, ina ua faia se fouvale i totonu lava o le pati ma suia ai le taitai i le sui faipule o Satupaitea, le Susuga Asiata Saleimoa. E lei toe aloaia ai lea pati i totonu o le palemene ina ua salalau tasi ma malepe ai.
O le People’s Party na faavae ina ua faatulai mai le suiga o le itu auala e feoai ai taavale a o amata ona faatalatalanoaina e le Malo ma tuuina atu le tulafono e faatino ai lea suiga i le Palemene. O le fesili pe faamata e mafai i tauiviga o le palota o le 2011 ona aveesea le HRPP?