Faataua pea le saogalemu i fale faigaluega, i aiga ma soo se vaipanoa

O le fonotaga sa faatautaia e le vaega o le Pasefika i le matagaluega a le ACC i Manukau, i le faaiuga o le vaiaso na tea nei, o se fonotaga e tele sona taua ma sona aoga mo tagata uma. O le avanoa sa molimauina foi e le toatele o i latou sa auai i lea feiloaiga sa faia i le hall a Malaeola i Magele. E le gata o le fonotaga sa feiloai ai sui mai le matagaluega, atoa ma sui o loo tauavea lea foi matata i totonu o kamupani ma fale faigaluega, i le vaaia o le saogalemu o tagata faigaluega, ae sa tatala ai foi le avanoa mo soo se tasi o loo manaomia faamatalaga e uiga i puipuiga ma lona taua.
O nisi o vaega sa taulai i ai le fonotaga, o le faailoa atu i tagata uma o auala e puipui ai mai faalavelave e ono tulai i le taimi o galuega, i totonu o kamupani ma fale faigaluega. E le gata i lea, ae faapefea ona faafesootai fesoasoani moomia pe a afaina i se faalavelave faafuasei.
O fesootaiga i le va o le tagata faigaluega ma le matagaluega a le ACC, mo le tapenaina o le taui, poo vaega tupe e totogi ane pe a aafia i faalavelave i galuega ma nofoaga faitele, poo totonu foi o le aiga.
O se tasi o itu sa faatauaina ma agai i ai aoaoga ma faamatalaga o lea aso, o le ao lea i tagata uma ona silasila totoa ma matauina uiga ma fesuiaiga i uiga o le tau.
O suiga o le tau o se vaega taua tele ma e tele foi sina aafiaga mo le saogalemu o le soifua o tagata, pe afai ae le usitaia ma faalogo i ai, aemaise o i latou e fiafia i faigafaiva ma taelega.
O le tau e aofia ai le savili ma lona malosi o loo agai mai, ae faapea le sami i taimi e sua mai ai ma le taimi e faanae atu ai poo le taimi e pe ai.
O isi vaega sa oo lava foi i ai le faasoa a le matagaluega, o le logoina lea ma fautuaina tagata uma ina ia tagai lelei i le taimi o taelega i totonu o vai ma fale o loo faamalu ai (pools).
O faamaumauga a le matagaluega o loo faamaonia ai le faatupulaia pea o le fuaninumera o tagata e aafia ma oo ina maliliu ona o le faatamala ma le le tausisia o tulafono ma taiala o loo limataitaia ai i totonu o fale faigaluega.
O isi ua mafua ona tafefea ma malelemo i le sami ona o le le usitaia foi o lapataiga ma uiga aemaise suiga o le tau e tulai mai i lea taimi i lea taimi.
O le tele o faalavelave e tutupu i vai taele, o loo faamaonia mai i lipoti, o le le mulimulitai i faasinoala ma puipuiga ua maea ona tuuina ane e le aufaigaluega poo ni tusitusiga foi.
O le mafuaaga tonu lea o le tau tata mai pea o le matagaluega ma le aufaigaluega Pasefika, ina ia lava ni faamatalaga o puipuiga ma se malamalamaga o tagata i lo latou siosiomaga poo fea lava poo totonu o galuega, tafaoga i nofoaga faitele, aemaise o totonu o aiga.
O le afioga ia Toleafoa Neil Faamatala Soonalole, ma le susu ia Atonio Asiava Tuipea, o loo finauina pea lea mataupu i totonu o le ACC, ina ia maua pea lea fesoasoani mo tagata Samoa ma le Pasefika.
O le maea ai o le fonotaga sa amata i le itula e iva i le taeao, na sosoo ai loa ma se taumafataga sa saunia mo le mamalu o le atunuu sa auai atu ma faataua lea feiloaiga. O se fuafuaga a le ofisa ma ia foi tamalii o le atunuu, ua faamautuina ai le faaauau pea o lea fuafuaga i fonotaga faalauaitele i totonu o le lua masina, i tausaga taitasi.