Pule Sili fou Matagaluega o Tina ma Tamaitai

Ua filifilia se isi tamaitai e avea ma Pule Sili fou o le Matagaluega o Tina ma Tamaitai, Atinae o Nuu ma Aga Fesootai, o ia lea o Kuiniselani Toelupe Tago.
Ua suitulaga o ia i se isi tamaitai o le atunuu le Afioga Luagalau Dr Foisagasina Eteuati Shon, ua faamavae i le tuanai o le tele o tausaga o avea ma faauluuluga o lea matagaluega a le Malo. O ia foi le uluai faauluuluga ina ua faatuina le matagaluega o Tina ma Tamaitai. Ua galue nei o ia i le Iunivesite Aoao a Samoa i le tofiga o le Lesitala o le Iunivesite.
E toatolu i latou o ni sui sinia o lea matagaluega sa faatalanoaina mo le avanoa Pule Sili ma filifilia ai Kuiniselani Toelupe Tago, ua leva tausaga o galue i le matagaluega e pei ona tofia o loo faauluulu ia te ia le vaega o galuega tau i le itupa o tina tamaitai.
Faaalia mai e se ofisa sinia o le Matagaluega, o le Aso Lulu o le vaiaso nei na faasilasila ai e le minisita o le matagaluega le Pule Sili fou.
O le faaiuga o le vaiaso ua mavae na malaga ai le tamaitai Pule Sili fou ma le Minisita o le Matagaluega le Afioga Fiame Naomi Mataafa, ma se isi ofisa sinia o le matagaluega e auai i se fono taua tele sa faia i Bangkok.
O le faatasiga lea na lauliliu ai mataupu a atunuu Asia ma le Pasefika e tuuina atu i le fono tele a Malo aufaatasi i le tausaga fou o le a faapitoa i le suesueina o tulaga o iai le ituvai o tina ma tamaitai o le lalolagi.
O le fono foi i Bangkok o le a toe iloilo ai faiga ma taiala sa soalaupule i se tasi o fonotaga tele sa talanoaina ai le sao o tamaitai sa faia i Saina lea e taua o le Beijing Platform of Action.
O le faatautoina o isi Pule Sili fou o matagaluega a le Malo e aofia ai ma le Komesina o Leoleo i le masina o Setema, e lei iai se Pule Sili o le Matagaluega o Tina ma Tamaitai, Atinae o Nuu ma Aga Fesootai, ona o le taimi lea e lei faia se faaiuga ona sa malaga le minisita o le matagaluega i ni fonotaga i fafo.
Faaalia e le Pule Sili ua filifilia lona agaga faafetai i le Malo i le iai o se talitonuga ma se faatuatuaga ia te ia na te tauaveina ai le pulea o le matagaluega, pe a fua i isi foi ofisa sinia o le matagaluega sa latou talosaga faatasi i le avanoa.