Ua savali nei i le 38 tausaga talu ona le‘i toe faataunuuina se savali o le Kerisimasi i Otara, lea sa gata mai lona faatinoina i le tausaga e 1978. A o lenei ua toe lalagaina i le tausaga 2014 ona o se manaoga o tagata Pasefika ma tagata o isi atunuu o loo alala ma papao i le itu i Saute o Aukilani aemaise lava le pitonuu o Otara, na tuuina atu i le Council e tatau ona toe susue ma toe faaolaola lenei vaega tāua o le Kerisimasi i totonu o lea pitonuu.
O lea sa galulue faatasi ai loa le Immanuel Community Trust ma le Otara Papatoetoe Local Board e fai se auala e faataunuuina ai le manaoga o le atunuu.
O le afiafi o le Aso Toonai 29 o Novema na toe lagonaina ai le felanulanuai o leo malie o meafaaili ma gagana eseese a atunuu taitasi sa latou faatāuaina lenei aso faapitoa. O faalapotopotoga, o kamupani ma ekalesia eseese sa maitauina le toatele o i latou sa savavali ai i lea savali o le Kerisimasi.
Na poloka uma totonu o le taulaga faatau i Otara i taavale feoai, ae faaavanoa le auala mo lenei faamoemoe. Sa matuā tumutumu lea nofoaga i le mamalu o le atunuu na molimauina lea aso tāua, aemaise o le galulue felagolagomai a susuga i alii ma tamaitai leoleo ma le Immanuel Community Trust lea o loo i lalo o le taitaiga a le susuga i le faafeagaiga ia Michael Peteru ma le Ekalesia o le Immanuel Worship Center i East Tamaki, mo le puipuia o tagata i le saogalemu mai faalavelave.
O le savali na amata i tua o le falepa‘u o le Tyre World ma faasolo atu ai i le isi pitonuu o Otara i le agai i Otahuhu ma toe mimilo mai ai ma faaiu i totonu o le taulaga faatau a Otara mo faafiafiaga. E iai nisi pitonuu o Aukilani o loo latou faatāuaina foi lea aso faapitoa i tausaga taitasi ae tasi lava le vaega o loo latou faatinoina, na o le taavale teuteuina.
A o Otara o loo latou faatinoina taavale teuteuina faatasi ai ma faafiafiaga, ma ua lua ai foi pitonuu o Aukilani o loo faatāuaina ia vaega e lua, o Otara ma Mangere Bridge.
E 11 faafiafiaga sa auai, lea sa tala malae ai le autalavou mai le Ekalesia o le Immanuel Worship Centre i le latou siva tau faamaoli ma le siva Samoa. O nisi o atunuu, ekalesia ma faalapotopotoga sa faapea ona faafiafia ia latou lava tu ma aganuu ua masani ai latou.
Na saunia foi le sosisi vevela ma nisi meaai taumafa mo le fofoga taumafa o le atunuu faapea vouchers na fai ai meaalofa, na fesoasoani atu ai le NZ Labour Hire ma le Cover Stuff Equipment, Otara Business Association o le Best Pacific Training faapea le ISKON Ltd.
Na maoae le sagisagi fiafia o mātua ma fanau i lea faamoemoe ona ua toe faateia Otara i pu ma leo tatagi o le Kerisimasi o lenei tausaga. O le faletua ia Ruanna Letalu o ia lea o loo fai ma sooupu o lenei faamoemoe, na ia faailo ai le agaga fiafia o le atunuu aemaise o susuga i alii ma tamaitai leoleo i le latou foi galuega i le mae‘a o le polokalame e leai se faalavelave na tupu.
O lea sa ia lagona ai lava le agaga fiafia ma le faafetai i le Atua ona ua tini ma le manuia le faamoemoe sa gapatia ai ma le atunuu aemaise o i latou sa galulue i lea aso.
Ma ua iai foi lona talitonuga o le tausaga fou o le a sili atu se isi mea e tupu ai nai lo le amataga, ae faamoemoe mea uma i le faatasi mai o le Atua.
