E $16.7 miliona tala Amerika le tau o le galuega fou ua amata nei i Malololelei auā ni faatanoa vai mamā mo le mamalu o le atunuu o loo nonofo i Vaivase-uta, Vailima ma Tapatapao.
O se talosaga na tuuina atu e le Malo o Samoa i le malo o Iapani i le tausaga e 2011 lea ua talia nei ma ua amata ai nei lea galuega. Faaalia e le Pulega o le Suavai e lua ni faatanoa vai tetele o le a fausia ma o le alu atu ai le suavai mama i nofoaga e pei ona ta’ua.
O le taimi lenei mo le talafatai lava o le taulaga e valu faatanoa tetele faapea o loo ua maua mai ai le suavai mama ma o le lua tetele la ia e aofia i le galuega tele lenei.
O faiga faa paaga nei na toe saunoa faafetai iai le alii Palemia ona o lea ua mafai ai lava ona tino mai le tele o galuega ua faagasolo i le atunuu ma o le atinae lenei o le a faamanuiaina ai le faitau aofai e tusa ma le to‘a 11,500 o loo nonofo i nei afioaga.
O le alii Palemia ma sui o le Kapeneta na auai atu ma sui o le ofisa o le vai faatasi ai sui o le Malo o Iapani auā le molimauina o le amataga o lenei galuega tele.
O le vaiaso ua tea na faamanatu faatasi ai le aso soifua o le tupu (Emperor) o le malo o Iapani ma le aso faamanatu o lea atunuu, ma o se sauniga i Samoa mo lea faamoemoe na momoli ai le faafetai a le Taitai o le Malo o Samoa le alii Palemia mo lenei atunuu ma ana fesoasoani tetele ua faamanuiaina ai Samoa.
O galuega tetele e pei o taligalu o le taulaga, o le faleaoga atoa o le Iunivesite Aoao o Samoa ma le falemai tele o Malietoa Tanumafili II i Tuasivi, o nisi ia o galuega na fausia e le malo o Iapani. E lē gata i lea o lana fesoasoani faaauau i aoga tulagalua a afioaga i tua ua faapea ona fausia e lea malo.
O lona ofisa o fesoasoani faavaomalo le Japan International Cooperation Agency (JICA) lea na aumai ai le fesoasoani lenei ua faatino ai lenei galuega mo le faamamā ai o le suavai e faaaogā e le mamalu o le atunuu.
