Toe faamavae foi le isi Tausala Samoa

Ua toalua Tausala o Samoa ua faamavae ma e le o se tulaga lelei i le silasila mai a isi atunu o le Pasefika, pe a fua i le taulamua o Samoa i le amataga mai o tauvaga e sailia ai se Tausala o le Pasefika i le naunautaiga e avea ma se tasi o vaega taua i le atinaeina o tagata tafafao.
O Novema o le tausaga ua mavae 2009 na faamavae ai Jacinta Bourne, lea na tuu atu aloaia ai le pale o le Tausala o le atunuu i le tamaitai o Tuisaleia Hope Pomele o lē na tulaga lua, na te faaauauina e tusa ma aiaiga o tauvaga faapea.
O Setema o le tausaga ua mavae na faia ai le tauvaga e sailia ai se tausala ma manumalo ai Jacinta Bourne, peitai o le savalia o le lua masina o lana nofoaiga na faamavae ai ona o mafuaaga tau ia te ia lava.
O lenei faatoa savali le tolu masina o le nofoaiga a Tuisaleia Hope Pomele, ae ua faamavae.
O mafuaaga ua iloa ai, lona le fiafia tele i nisi o tulaga sa ia molimauina i le latou mafutaga puupuu ma le Pulega o Tagata Tafafao, le Samoa Tourism Authority le STA.
I le tusi faamavae a le tamaitai tausala o loo ia folasia ai nisi o mafuaaga e pei o le fesiligia pea o lona tulaga tagatanuu moni o Samoa, aemaise o le fale sa tuu atu e nofo ai i Fagalii-Uta e leai se vai.
E leai foi ni meaai toe fiu e fesootai i tagata o le ofisa o tagata tafafao mo se fesoasoani e faaleleia ai ia vaega, sa tuai ona tali atu.
O lana konekarate le isi itu na ia taua sa fia maua i ai sona silafia, ina ia ona iloa ai aiaiga o lana galuega ma ona tiute o le Tausala o le atunuu.
Fai mai Tuisaleia na faatoa oo ane le tamaitai Pule Sili o le pulega, Matatamalii Sonja Hunter ma nisi o le pulega ma le komiti faafoe o le STA, i le Aso Gafua, 8 o Fepuari 2010 ma faailoa ane aiaiga o lana konekarate.
E iai vaega faaletulafono o aiaiga o loo nunumi ai le tamaitai, o le isi lea mafuaaga o lona le fiafia, ona o lea faatoa faailoa atu.
E le o faailoaina mai e le tamaitai poo a ia aiaiga faaletulafono.
Peitai o vaega o tulafono tau femalagaiga e atagia mai o le autu lea o lona le fiafia, ma atonu o le mafuaaga lea o le fesiligia pea o ia i lona tulaga tagatanuu Samoa.
Faaalia e le tamaitai Pule Sili o le STA, e le o le mafuaaga lea o le fesiligia o le tamaitai, ae ona o tiute o le pulega e tatau ona silafia le tupuaga o le tamaitai i ona piitaga faaleaiga i Samoa e faatatau mo le faafaigofieina o ana femalagaiga, ona o loo ia umia se tusifolau tagatanuu Amerika.
Ua ave le faafetai a Matatamalii Sonja Hunter ia Tuisaleia Hope Pomele mo se taimi puupuu na latou mafuta ai, ina ua ia talia le avea ma Tausala o Samoa.
O moomooga lelei foi mo ia i le lumanai ina ia manuia ana taumafaiga uma.
E le o iloa poo ai le tamaitai o le a faaauauina le tofiga, ona o le tamaitai na maua le tulaga tolu le second runner up, i le tauvaga o le Tausala o Samoa o loo i fafo i aoaoga.