Faailoa le igoa o se tamaitai i le mataupu o le tosoteine

Ua le talia e le Faamasinoga Maualuga se talosaga a se tamaitai ua faia sana tagi o le tosoteine faasaga i se alii talavou na la aooga faatasi.
O lenei mataupu na tulai mai i le Iunivesite Aoao o Samoa ia Fepuari o le tausaga na te’a nei.
Na faateia ai le toatele i tala o le maua atu o se tamaitai talavou i le fale-lē-ta’ua ua matapogia mai ma ua vaaia ai le palapala o loo taoto ai.
Na taofia le ua molia ma na suesueina ona na masalomia e toatele i latou na faia lenei osofaiga – peitai o vaiaso na sosoo ai o le suesuega a Leoleo na taofia ma molia ai na o se alii aoga i Lepapaigalagala se toatasi.
O se siva tele a le aoga na faatautaia ai i le Maota Samoa o loo i lea nofoaga na faia i le po na faapea lipoti a leoleo na tulai mai ai lenei faalavelave.
O le tamaitai na agai i le fale-lē-ta’ua ae na maua mulimuli ane ai e nisi na agai atu i lea fale malolo o loo taoto mai le tamaitai.
O loo matua teena e le alii talavou ua tuuaia i le toso teine lenei mataupu ma o lea la ua amata lona iloiloga i luma o le Faamasinoga Maualuga.
O le tulai o le tamaitai talavou lenei e folasia lana molimau ma lana faamatalaga o lenei mataupu na laga ai loa ma se talosaga i le Faamasino o le Faamasinoga Maualuga le Afioga Vui Clarence Nelson pe mafai lava ona faatautaia lana mataupu i se auala ua sa ai tagata faalogologo poo sui tusitala foi.
Na ia ta’ua le maasiasi i lenei mataupu ma le manaoga ina ia aua nei faalauiloa atu lona tagata. Peitai o le tali a le Alii Faamasino e faigata tele le manaoga ua tuu atu i Lumamea ona o le itu lea e le o se teine e i lalo ifo o le 16 tausaga le matua e pei ona faamalosia ai tapu i le faasalalauina o igoa o i latou e aafia i ia mataupu.
Na ta’ua foi e le Afioga Vui Clarence Nelson, ona pau lava teineiti e mafai ona puipuia e le Faamasinoga mai i le faalauiloa o o latou igoa, ma le igoa o le tagata e faia solitulafono faasaga i ia teineiti.
O le itu lea ua manino le faamasinoga o lenei tamaitai ua sili atu i le 16 tausaga le matua ua faaauau ai pea ona tatala le avanoa i le au faasalalau ma le au tusitala ina ia lipotia ai lenei mataupu.
Ua faaauau ai foi ma le tulaga lea e mafai ona faailoa i la’ua uma o loo aafia ai i lenei mataupu.
O loo faaauau le iloiloga o lenei moliaga o le toso teine. I galuega faatusitala lava ia o loo tapu ai le faailoa o ni igoa poo soo se auala e ono iloa ai se tasi e osofaia i solitulafono matagā aemaise lava la i fanau teine laiti pe faatonu mai ai e le Faamasinoga pe leai foi.
O le tulaga foi la e pei ona iai le talosaga a lenei tamaitai ua tuu atu foi i le faitalia a ofisa faasalalau poo nusipepa foi, poo le a so latou finagalo pe talafeagai le faailoa o le igoa o lenei tamaitai aemaise o lē na faia le solitulafono faasaga ia te ia, poo le filifili foi e taofi le faalauiloa o le igoa o le tamaitai lenei.