Taulai auaunaga “Mapu Maia” mo tagata Pasefika Auikilani

Ua matauina pea le toatele o tagata e fiafia i le pele tupe poo taaloga faitupe.
O se tasi o mafuaaga autu o le tatalaina o se isi foi lenei o auaunaga o loo taulai a latou fesoasoani i ē ua afaina olaga ona o le pele tupe.
O le Aso Lua, aso 9 o Fepuari, na tatala aloaia ai i Aukilani lea vaega faa-Pasefika, ua faaigoaina o le “Mapu Maia”. O lenei vaega fou, o loo galulue i lalo o le faamalumaluga a le vaega autu, le Problem Gambling Foundation.
E silia ma le 50 tagata na auai atu i lea sauniga, e aofia ai sui mai vaega eseese a tagata Pasefika, Matagaluega o mataupu tau Motu o le Pasefika (Ministry of Pacific Island Affairs), le vaega a Fanau, Talavou ma Aiga (Child Youth and Family), Kaumatua, leoleo, o sui mai nisi o fata faitaulaga, ma isi vaega ma faalapotopotoga faapena, faapea le komiti faafoe a le soifua maloloina a le itumalo a Waitemata, o loo latou lagolagoina lenei auaunaga fou.
O le failauga faapitoa i lea aso o le susuga Cr Alfred Filipaina, o loo galue o se faufautua (liaison) a le Matagaluega a Leoleo a Niu Sila mo tagata Pasefika. Na lauga foi le Pule Sili o le Problem Gambling Foundation, susuga Graeme Ramsey, ma ia taua ai o lenei auaunaga o loo faatino e tagata Pasefika mo tagata Pasefika (‘by Pasifika, for Pasifika service’).
Faaalia e le faletua ia Pesio Ah-Honi Siitia, o loo faauluulu i ai lenei vaega fou, le Mapu Maia, lona lagona faagaeetia ona o le lagolago malosi a tagata o le komiuniti i lenei vaega, aemaise ua mafai foi ona faatino ai se auaunaga maeaea, ma talafeagai e tusa ai o tu ma agaifanua a tagata Pasefika.
O le a galulue vavalalata le Mapu Maia ma vaega eseese a tagata Pasefika, ina ia a a‘oa‘o ma toe faamanatu atili ia i latou aafiaga lē lelei e faapogaia e lenei masaniga o le pele tupe.
Na faamatala foi e le faletua ia Pesio le uiga loloto o i tua o le igoa o latou vaega. O le Mapu Maia, e faasino atu i se nofoaga e te afio mai i totonu ma malolo ai, poo se fale – o se nofoaga e toe maua ai sou faamoemoe – o le agaga moni lena o loo taulai i ai lenei auaunaga mo aiga Pasefika o loo aumau i Aukilani nei.