“O le taunuuga lena o suesuega i le susuga
a Luatimu Samau”…Leaupepe Fatu Pula
E lē o nofoai le Komesina ma le pulega o le Matagaluega o Leoleo ma Falepuipui i le tele o tuuaiga faasaga i le auaunaga a leoleo. Ua faailoa nei e le sui sooupu o le Matagaluega o Leoleo ma Falepuipui, le afioga Leaupepe Lealaitagomoa Fatu Pula, e lē o le ma‘ema‘e ma le finau mai o se tasi o tausoga o le tina o Faasalafa Sione, ua molia ai le alii leoleo asiasi (police inspector) o Luatimu Samau.
“E leai, o le suesuega lava a le matagaluega sa faaauau i le mataupu, lea ua taunuu i le faaiuga e molia le alii leoleo sinia”.
O le suesuega faalotoifale i le faaoolima i le tina o Faasalafa, na muamua lava faia ai le fautuaga e faavae i ni molimau ina ia molia tamaitai leoleo e toalua o Efo Moalele ma Ferila Papalii.
Peitai e faailoa lea faaiuga ae lau manu‘ia faamatalaga ma molimau i lē ua molia, o le leoleo na taitaia le suesuega i le maliu o le teineititi 14 tausaga, le afafine o le tina o Faasalafa.
Ua faamaonia mai e Leaupepe o le susuga i le taitai leoleo ia Luatimu Samau sa taitaia le suesuega i Tiavea-tai i Aleipata, lea na auai ma tamaitai leoleo o Ferila ma Efo.
E lei atoa se lua vaiaso talu ona taliu mai i Samoa le tamaitai leoleo satini o Efo, ae filifilia i le vaega suesue na sailia le mataupu i le alo tamaitai o Faasalafa ma lona toalua o Sione lea o loo soloatoa i le falepuipui ina ua la ioeina lo la faaoo o le oti i le teineitiiti. Na mae‘a suesuega a leoleo i le mataupu e lei maua lava le vaega tonu na tanumia ai le tino maliu o le teineiitiiti.
I le faia o le faaiuga e molia le susuga Luatimu i le moliaga o le faia o se faaooga manu‘a i le tina o Faasalafa, ua toatolu ai leoleo ua tuuaia i lenei mataupu.
O manu‘aga o le tina na aafia na faasalalau i nusipepa se mafoe tele i le pou o lona isu.
Sa iai molimau e faapea na sulu Faasalafa, o le mafuaaga lena o le manu‘a o le pou o lona isu. Peitai sa teena e lona tausoga ia faamatalaga a leoleo, ona e faapea o le molimau a le tina na fasi o ia.
O moliaga ua faasaga i tamaitai leoleo e toalua ma le alii leoleo asiasi o le a suesueina e le faamasinoga i lona atoaga pe a amata iloiloina lenei mataupu.
O Setema o le tausaga nei e suesueina ai molimau o moliaga o Efo Moalele o se tamaitai leoleo Satini ma Ferila Papalii o se leoleo.
Ua mae‘a ona tuuina atu le la tali tetee i moliaga ina ua tutulai i le Faamasinoga Maualuga lea ua faasee i ai o la moliaga ona e fai si matuia.
O le aso 24 o Me 2011 o le a valaau ai mo le taimi muamua moliaga o Luatimu Samau i le faamasinoga faaitumalo. Ua faamalolo lē tumau uma i latou ae maua lava o latou totogi, e faatali ai le mae‘a o latou faamasinoga.
