O se tasi o galuega tele a le Ekalesia EFKS i Samoa, na tatalaina i le vaiaso talu ai a o faagasolo le fonotaga faaletausaga a le ekalesia i lona laumua i Malua, o lona fale mataaga.
Molimauina le matagofie tele o lenei galuega, ma ua valoia ai foi le ono faatoateleina atili ai o tagata e fia gasolo atu i Samoa, auā foi le afea o lenei fale mataaga ma maimoaina le tele o galuega matagofie (finearts) mai le Pasefika, o le a faatulaga ai i totonu o lenei fale mataaga.
Ta‘ua i lipoti e tusa ma le $5.7 miliona le tau o lenei galuega atoa. E ui o se galuega e faasino tonu i le Ekalesia Faapotopotoga Kerisiano i Samoa, ae i le tatalaina o lenei galuega tele, na saunoa ai le Afioga Tuiloma Pule Lameko i sana faafetai i lenei galuega matagofie, ‘o se sao lenei o le Ekalesia mo le faatuputeleina o le tamaoaiga o le atunuu e ala i le atina‘e o tagata tafafao e maimoa mai i totonu o le atunuu.’
O lenei fale, e lē gata o le a faatulaga uma ai ata eseese ma mamanu a fanau a le ekalesia o loo a‘oa‘oina i lana aoga tusiata i Leulumoega, ae o le a avea foi ma nofoaga e teu malu ai faamaumauga a le ekalesia ma mea uma e fesootai ma lona tala faasolopito.
O loo faatulaga ai mo maimoaga masini lomitusi tuai sa faaaogā mo le lolomiina o tusi a le ekalesia i le tau amatamataga mai o le galuega, aemaise lava i galuega o le faaliliuina o le Tusi Paia ma tusitusia le gagana Samoa e pei ona galulue punouai ai uluai misionare na latou amata maia le fafauina o le alafapeta faa-Samoa.
O lenei galuega na amata mai le tausaga e 2008, o se galuega na finau malosi i ai se tasi foi o tamā iloga o le ekalesia a o tulai mai i lona tofiga o le taitaifono o le CCCS, le faafeagaiga ia Reverend Elder Atapana Alama.
O se atina‘e na malosi lona unaia ina ua matauina le tele o galuega matagofie a le aoga tusiata a Leulumoega, ae ua amata ona toe faaleagaina ona o le leai o se nofoaga mautu e faatulaga ma teu malu ai.
O le ata ma le fausiaina o lenei galuega na faatino lava foi e se tasi o alo e faasino i le Ekalesia, le susuga Lale Ieremia Jr, ma lana kamupani e feagai tonu ma galuega tetele faapenei, le Arrow International Ltd.
Ma o se galuega sa faia uma ma faamae‘a e Ieremia ma lana kamupani, e aunoa ma se totogi.
